Rice Festival: ‘महाएफपीसी’तर्फे गुलटेकडी येथे तांदूळ महोत्सव सुरू

Pune News: महाफार्मर्स प्रोड्यूसर कंपनी लि. (महाएफपीसी) आणि नाफेड ई-किसान मंडी यांच्या वतीने तिसऱ्या तांदूळ व कडधान्य महोत्सवाचे आयोजन गुलटेकडी येथील महाएफपीसी यार्ड, येथे करण्यात आले आहे. या महोत्सवाचे उद्‌घाटन ‘सकाळ-ॲग्रोवन’चे संपादक-संचालक डॉ. आदिनाथ चव्हाण यांच्या हस्ते बुधवारी (ता.५) करण्यात आले.

‘महाएफपीसी’च्या वतीने राज्याच्या विविध भागांतील तांदूळ व कडधान्य उत्पादक शेतकरी उत्पादक कंपन्या, शेतकरी बचत गट, नव-उद्यमी, कंपनींना २० दालने उपलब्ध करून दिली आहेत. येत्या १३ फेब्रुवारीपर्यंत हा महोत्सव सुरू राहणार आहे.

या निमित्ताने शेतकऱ्यांना खरेदीदार ग्राहकांशी थेट संवाद व माल विक्रीचे व्यासपीठ रास्तदरात उपलब्ध करून देण्यासाठी महाएफपीसीमार्फत या महोत्सवाचे आयोजन करण्यात येत असल्याचे योगेश थोरात यांनी सांगितले. यासाठी पुणेकर ग्राहकांनी जास्तीत जास्त संख्येने उपस्थित राहून याचा लाभ घ्यावा, असे आवाहन करण्यात आले.