New Electricity Connection : नाशिक परिमंडळात १४०२ नवीन वीजजोडण्या

Nashik News : सेवा पंधरवड्याच्या पहिल्या आठवड्यातच महावितरणच्या नाशिक परिमंडळात १ हजार ४०२ नवीन वीजजोडण्या देण्यात आल्या आहेत. तर वीज बिलावरील नावात बदलाचे प्रलंबित ६६४ अर्ज कार्यवाही झाली असून तसेच महावितरण पोर्टलवरील वीज ग्राहकांचे ३५५ अर्ज निकाली काढण्यात आले आहेत.

राज्य शासनाने सेवा हक्क कायदा अंमलात आणला आहे. याची प्रभावीपणे अंमलबजावणी करण्याचे आदेश महावितरणच्या कोकण प्रादेशिक विभागाचे सहव्यवस्थापकीय संचालक दिलीप जगदाळे यांनी दिले आहेत.

त्यानुसार नाशिक परिमंडळाचे मुख्य अभियंता सुंदर लटपटे यांनी दिले आहेत. २८ एप्रिल ते १२ मे दरम्यान सेवा हक्क पंधरवडा दरम्यान प्रलंबित नवीन वीजजोडणी, वीज बिलावरील नावात बदल व दुरुस्ती तसेच विविध तक्रारींचे निवारण करण्याचे निर्देश देण्यात आले आहेत.

त्यानुसार नाशिक परिमंडळात नवीन वीजजोडणीचे १ हजार ९८० अर्ज प्रलंबित होते. यातील १ हजार ४९२ अर्जदारांना सेवा पंधरवड्याच्या पहिल्या आठवड्यातच नवीन वीजजोडणी देण्यात आली असून उर्वरित ५७८ अर्जावर कार्यवाही सुरू आहे.

तर वीज बिलावरील नावात बदल करण्याबाबतच्या ६८९ अर्जापैकी ६६४ अर्जावर कार्यवाही करून प्रकरणे निकाली काढण्यात आलेली आहेत. महावितरणच्या पोर्टलवर आलेल्या ५२२ ऑनलाइन अर्ज अथवा तक्रारींपैकी ३५५ प्रकरणांचे निवारण करण्यात आले आहे. उर्वरित १६७ तक्रारींवर कार्यवाही सुरू आहे.