Maharashtra Sugar Industries : राज्याचा साखर उतारा व गाळप घटलं; ३१ डिसेंबरअखेर २९ लाख टन साखर उत्पादन

Maharashtra Sugar Production : १५ नोव्हेंबरपासून सुरू झालेला ऊस गळीत हंगाम डिसेंबरमध्ये वेगाने सुरू झाला. दरम्यान राज्यात ३१ डिसेंबरअखेर १९० साखर कारखान्यातून २९ लाख १५२० टन साखरेचे उत्पादन झाले आहे. मागच्या वर्षी ३१ डिसेंबरअखेर ३८ लाख ३ हजार टन झाले होते. राज्याचा सरासरी साखर उताराही गतवर्षीच्या तुलनेत घटला असून, तो ८.९ वरून ८.६ वर आला आहे. कोल्हापूर विभागाचा उतारा सर्वाधिक १०.१३ असून सर्वांत कमी नागपूर विभागाचा ४.९२ असल्याची माहिती साखर आयुक्त विभागाकडून मिळाली आहे.

साखर आयुक्त विभागाकडून मिळालेल्या माहितीनुसार, राज्यात सहकारी ९६ आणि खासगी ९४ अशा १९० साखर कारखान्यांचा गळीत हंगाम सुरू आहे. या कारखान्यांनी ३१ डिसेंबरअखेर ३३८ लाख ९४ हजार टन उसाचे गाळप केले आहे. यातून २९ लाख १५२० टन साखरेचे उत्पादन झाले आहे.

पुणे विभागात ८४.६४ लाख टन उसाचे गाळप

पुणे विभागात ८४.६४ लाख टन उसाचे गाळप झाले आहे. त्यापासून ७३.६८ लाख क्विंटल साखरेचे उत्पादन झाले असून सरासरी रिकव्हरी दर ८.७१ टक्के आहे. पुणे विभागात ३१ कारखाने कार्यरत असून त्यात १८ सहकारी साखर कारखाने आणि १३ खाजगी कारखान्यांचा समावेश आहे.

कोल्हापूर विभागात ३९ कारखाने चालू असून त्यांनी ७८.५९ लाख टन उसाचे गाळप केले आहे. आतापर्यंत ७९.६३ लाख क्विंटल साखरेचे उत्पादन मिळाले आहे. या विभागाने राज्यातील सर्वाधिक १०.१३ टक्के साखर उतारा मिळविला आहे.

सोलापुरात ४१ साखर कारखाने कार्यरत

सोलापुरात ४१ साखर कारखाने कार्यरत असून त्यामध्ये १६ सहकारी आणि २५ खासगी कारखान्यांचा समावेश आहे. या कारखान्यांनी ५९.३२ लाख टन उसाचे गाळप केले असून ७.६२ टक्के रिकव्हरीसह ४५.२१ लाख क्विंटल साखरेचे उत्पादन केले आहे.

अहमदनगर विभागात २५ कारखाने सुरू असून त्यापैकी १५ सहकारी आणि १० खासगी आहेत. या कारखान्यांनी ४३.१९ लाख टन उसाचे गाळप केले आहे. ७.९६ टक्के रिकव्हरी रेटसह ३४.३७ लाख क्विंटल साखरेचे उत्पादन झाले आहे.