Banana Export : केळी निर्यातीमध्ये महाराष्ट्र आघाडीवर

Jalgaon News : केळी निर्यातीत देशातून सतत वाढ होत आहे. एप्रिल २०२३ ते जून २०२४ या कालावधीत देशातून सुमारे २४ हजार कंटेनर (एक कंटेनर २० टन क्षमता) केळीची निर्यात झाली आहे. २०२२-२३च्या तुलनेत ही निर्यात सुमारे सात हजार कंटेनरने वधारली आहे. तर देशात केळी निर्यातीत महाराष्ट्राने आघाडी घेतली आहे.

इस्राईल व आखातात तणाव असल्याने निर्यातीसंबंधी अडचणी आल्या. सुएझ कालव्याऐवजी आफ्रिकेला वळसा घालून निर्यात सुरू राहिली. यात निर्यातीसंबंधी भाडेवाढ झाली. अशातही केळी निर्यात वाढली आहे. केळीची सर्वाधिक निर्यात आखातात झाली आहे.

केळी निर्यातीत महाराष्ट्राने आघाडी घेतली असून एकूण निर्यातीत महाराष्ट्राचा वाटा ६२ टक्क्यांपर्यंत राहिला आहे. या पाठोपाठ गुजरात, आंध्र प्रदेश व केरळ येथून केळी निर्यात झाली आहे. देशात केळी लागवडीचे पॅटर्न, कालावधी बदलले आहेत.

बारमाही केळी निर्यातीसाठी उपलब्ध आहे. राज्यात केळी लागवडीत वाढ झाली नाही. परंतु दर्जेदार व निर्यातक्षम केळी अधिकची उपलब्ध होत आहे. परिणामी निर्यातीत वाढ होत असल्याची माहिती मिळाली.

राज्यातून अजूनही केळी निर्यात सुरू आहे. सर्वाधिक निर्यात सोलापूर भागातून झाली आहे. परंतु सोलापुरात उन्हाळ्यात केळी निर्यातीसाठी उपलब्ध नव्हती. या कालावधीत खानदेशात केळी अधिकची उपलब्ध झाली. रोज १०० ट्रक (एक ट्रक १० टन क्षमता) केळी मार्च ते मे या कालावधीत खानदेशात निर्यातीसाठी उपलब्ध झाली.

रोज १० कंपन्या केळी निर्यातीचे काम खानदेशात उन्हाळ्यात करीत होत्या. सध्या सोलापुरात केळी उपलब्ध नाही. खानदेशातून रोज चार कंटेनर केळीची निर्यात होत आहे. तसेच देशांतर्गत बाजारातही रोज २१० ट्रकपेक्षा अधिकची केळी खानदेशातून पाठविली जात आहे.

मागील हंगामाच्या तुलनेत दर कमी

‘कुकुंबर मोझॅक’ विषाणूची समस्या एप्रिल व मे या महिन्यात लागवड केलेल्या केळी रोपांत कमी येत असल्याचे लक्षात घेऊन एप्रिल व मे २०२३ मध्ये अनेकांनी केळी लागवड केली. जून व जुलैत केळी लागवड टाळली.

परिणामी यंदा मार्च व एप्रिलमध्ये निर्यातक्षम केळी अधिकची काढणीवर आली. देशांतर्गत व निर्यातीसाठी मिळून खानदेशात रोज ६०० ट्रक केळी काढणीसाठी एप्रिल व मे महिन्यात उपलब्ध होती. २०२२-२३ मध्ये निर्यातीच्या केळीला कमाल ३२०० रुपये प्रतिक्विंटलचा दर मिळाला. यंदा मात्र कमाल दर १६०० रुपये प्रतिक्विंटल, असा मिळाला.