Bhu-Pranam Land Record Centres: राज्यात ३० ‘भू-प्रणाम’ भूमापन केंद्रे सुरू होणार

Pune News: शेतकऱ्यांना शेतीसंबधी लागणारे विविध कागदपत्रे मिळविण्यासाठी शासकीय कार्यालयात जावे लागत होते. परंतु संगणकीकृत मिळकत पत्रिका, सात-बारा उतारा, जमिनींचे रंगीत नकाशे, फेरफार नोंदीचा उतारा अशा कागदपत्रांसाठी आता भूमी अभिलेख विभागाच्या कार्यालयांमध्ये चकरा मारण्याची गरज नाही. सेतू सुविधा केंद्रांपेक्षा अत्याधुनिक सुविधा आता भूमी अभिलेख विभागाच्या ‘भू-प्रणाम’ केंद्रामधून मिळणार आहे, अशी माहिती भूमी अभिलेख विभागाच्या सूत्रांनी दिली.

राज्यातील ३० जिल्ह्यांमध्ये अशी अत्याधुनिक केंद्रे उभारण्यात येत आहेत. येत्या एप्रिलपासून ही सुविधा केंद्रे सुरू होणार आहेत. भूमी अभिलेख विभागाच्या वतीने देण्यात येणाऱ्या विविध कागदपत्रांसाठी नागरिकांना वारंवार कार्यालयांमध्ये हेलपाटे मारावे लागतात. कित्येकदा भूमी अभिलेख विभागाच्या वेगवेगळ्या ठिकाणी असलेल्या कार्यालयांमध्ये नागरिकांना कर्मचाऱ्यांच्या गैरवर्तणुकीचा वाईट अनुभव येतो.

या कार्यालयामधील मूळ कामाला विलंब होणे आदी होणाऱ्या गैरसोयी टाळण्यासाठी तसेच नागरिकांना उत्तम सेवा-सुविधा मिळावी यासाठी भूमी अभिलेख विभागाने राज्यातील ३० जिल्हा मुख्यालयांमध्ये सेतू सुविधा केंद्रांप्रमाणेच अत्याधुनिक सुविधा केंद्रे उभारण्याचा निर्णय घेतला आहे. या सुविधा केंद्रांना ‘भू प्रणाम’ केंद्र असे नाव देण्यात आले आहे.

जिल्ह्याच्या ठिकाणी असलेले भूमी अभिलेख उपअधीक्षक आणि नगर भूमी अधिकारी कार्यालयांच्या ठिकाणी ही सुविधा केंद्रे उभारण्यात येणार आहेत. प्रत्येक सुविधा केंद्रासाठी राज्य शासनाने प्रत्येकी दहा लाख रुपयांचा निधीदेखील उपलब्ध करून दिला आहे. भूमी अभिलेख विभागाच्या वतीने मागील वर्षीपासूनच भूमपान केंद्रे सुरू करण्याचा प्रस्ताव मंजूर झाला होता. आता मात्र या प्रस्तावास मूर्त रूप आले आहे. त्यामुळे आता राज्यातील ३० जिल्ह्यांत ‘भू-प्रणाम’ केंद्र सुरू करण्याचा मार्ग मोकळा झाला आहे.