Drought Crisis : पाण्याशिवाय जगणं मुश्किल झालंय

Parbhani News : जगणं मुश्किल झालं आहे गावात पाणी नसल्यामुळं. एकवेळ जनावरांना चारा उसना आणता येईल. परंतु पिण्याचे पाणी आणायचे कुठून. गावात सरकारी टँकर सुरू झालाय, पण पिण्यासाठी शेतातील विहिरीहून गाड्यावर, डोक्यावरून पाणी आणावे लागत आहे. विहिरी आटल्यावर येलदरीच्या तळ्याकाठी राहायला जावे लागते की काय, अशी भीती कोरवाडी (ता. जिंतूर) येथील अल्पभूधारक शेतकरी ग्यानदेव कोंडाळ यांनी व्यक्त केली.

जिंतूर तालुक्यामध्ये जून ते सप्टेंबर या कालावधीत सरासरी ७३३.४० मिलिमीटर पाऊस अपेक्षित असताना २०२३ मध्ये ४९९.७० मिलिमीटर (६८.१० टक्के) पाऊस झाला. जमिनीतील अपुऱ्या ओलाव्यामुळे खरीप पिकांच्या उत्पादनात ६० ते ७० टक्क्यांपर्यंत घट झाली. डोंगराळ भागातील गावांमध्ये पाणीटंचाईचे संकट अधिक गंभीर झाले आहे.

देवगाव, जोगवाडा, बेलखेडा, वडाळी, चारठाणा, चिंचोली, केहाळ, दहेगाव हे लघू तलाव कोरडे पडले आहेत. भोसी, आडगाव, पाडाळी या तलावांतील उपयुक्त पाणीसाठा संपला आहे. परिणामी, या भागातील शेतकरी, ग्रामस्थासह जनावरांना पाण्यासाठी भटकंती करावी लागत आहे. कोरवाडी, ब्राह्मणगाव, मोहाडी, वाघी धानोरा या चार गावांना, तसेच शिवाचीवाडी येथे टँकरद्वारे पाणीपुरवठा केला जात आहे.

तसेच १० विहिंरीचे अधिग्रहण करण्यात आले आहे. शेवडी, भोसी, पिंपळगाव काजळे, कुऱ्हाडी, दहेगाव, दहेगाव तांडा, कावी, कोरवाडी, कोरवाडी तांडा आदी गावातील उन्हाचा पारा वाढत आहे. तसेच पाणीटंचाईचे संकट दिवसागणिक बिकट होत आहे. माळरानाच्या दगडगोट्यांच्या हलक्या, मुरमाड जमिनी असलेल्या या भागातील शेतकऱ्यांची दारोमदार खरिपातील सोयाबीन, कपाशी, तूर या पिकांवर असते.

रब्बीचे क्षेत्र खूप कमी असते. नोव्हेंबर अखेरीस झालेल्या पावसामुळे रब्बीची पेरणी झाली. परंतु त्यानंतर ओलावा नष्ट झाल्यामुळे रब्बी पिकांची वाढ खुंटली. या भागात खरिपाची सुगी आटोपली की गावात कामे राहात नाहीत. त्यामुळे अल्पभूधारक शेतकरी, मजुरांचा ऊसतोड तसेच अन्य कामांसाठी शहराकडे स्थलांतर हे दरवर्षी ठरलेलच आहे. यंदा दुष्काळामुळे स्थलांतर वाढले आहे.