Leopard Attack : पन्हाळा तालुक्यात बिबट्याचा वावर, जनावरांवर हल्ले सुरूच

Leopard In Kolhapur : कोल्हापूर जिल्ह्यातील शाहूवाडी आणि पन्हाळा तालुक्यात बिबट्यांचा वावर वाढल्याने ग्रामस्थांमध्ये भितीचे सावट निर्माण झाले आहे. पन्हाळा तालुक्यातील साळवाडी येथील संभाजी गणपती घाटबांधे यांच्या गोठ्यात असणाऱ्या रेडकावर बिबट्याने काल(ता.१७) पहाटे चारच्या सुमारास हल्ला केला. यामध्ये रेडकाचा मृत्यू झाला. त्यामुळे परिसरात भीतीचे वातावरण आहे.

याबाबत अधिक माहिती अशी, दोन दिवसांपासून कुंभारवाडी येथील शिवारात असणाऱ्या बिबट्याने आपला मोर्चा साळवाडी येथे वळविला आहे. संभाजी घाटबांधे यांच्यासह अन्य ग्रामस्थांची गायरानमध्ये घरे व जनावरांचे गोठे आहेत. घाटबांधे यांच्या घरासमोर असणाऱ्या या गोठ्यात एक म्हैस, एक गाय व एक वर्षाची रेडी अशी जनावरे आहेत.

सहाच्या सुमारास गोठ्यात गेले असता रेडकू दिसले नाही. अन्यत्र शोध घेतला असता रक्त पडलेले दिसले. शेजाऱ्यांना बोलावून पाहणी केली असता ते रेडकू दोनशे फुटांपर्यंत ओढत नेत भगवान म्हामुलकर यांच्या उंच गवतात अर्धवट खाल्लेल्या अवस्थेत दिसून आले.

याबाबत वन विभागाला कळवण्यात आले. वनपाल नाथा पाटील, वनरक्षक स्वप्नील काशीद, वनमजूर निवृत्ती चौधरी, राजन भंडारी, किरण कुंभार, संभाजी चौगले यांनी पाहणी करून नुकसान भरपाईबाबत पंचनामा केला. तो प्राणी बिबट्याच असल्याचा दुजोरा त्यांनी दिला आहे.

ट्रॅप कॅमेरा लावून शोध

बिबट्याने रेडकू अर्धवट खाऊन टाकलेल्या ठिकाणी रात्री ट्रॅप कॅमेरा लावणार असल्याचे वनविभागाने सांगितले. बिबट्या अधिक दिवस तेथे वास्तव्यास असल्यास त्याला पकडण्यासाठी सापळा लावण्यात येणार असल्याचे वन विभागाने सांगितले.

नशीब बलवत्तर म्हणून...

साळवाडी शिवारात गव्यांकडून पिके फस्त केली जात असल्याने शेतकरी राखणीला जातात. बिबट्याने ठार केलेले रेडकू ज्या ठिकाणी खाल्ले, तेथेच काही अंतरावर साळवाडीचे सरपंच भगवान म्हामुलकर आपल्या शेतात मचाणावर राखणीला होते. रात्रभर जागल्याने त्यांना पहाटेची गाढ झोप लागली होती. नशीब बलवत्तर म्हणून बिबट्या काही अंतरावरून परत फिरला.