Water Management : हा तर सहकारी पाणी वापर संस्थांचा संक्षिप्त इतिहासच

Nashik News : जलसंपदा विभागात नोकरीला असताना इंजिनिअर लक्ष्मीकांत वाघावकार यांनी धरण कालव्याचे बांधकाम तसेच जलव्यवस्थापनेच्या कामात महत्त्वपूर्ण योगदान दिलेले आहे. त्या समृद्ध अनुभवांचे आणि तांत्रिक तपशिलांचे हे लेख त्यांनी संकलित करून पुस्तकात सोप्या व सहज शैलीत मांडले आहेत.

हे पुस्तक म्हणजे सहकारी पाणी वापर संस्थांच्या विषयी केलेले काम, त्याचे स्वरूप व्याप्ती आणि अनुषंगिक माहिती म्हणजे सहकारी पाणी वापर संस्थांचा संक्षिप्त इतिहासच, असे म्हणता येईल, असे प्रतिपादन जलसंपदा विभागाचे लाभ क्षेत्र विकास सचिव डॉ. संजय बेलसरे यांनी केले.

('ॲग्रोवन'चं व्हॉट्सअ‍ॅप चॅनल जॉईन करण्यासाठी येथे क्लिक करा)

जलसंपदा विभागाचे सेवानिवृत्त शाखा अभियंता व समाज परिवर्तन केंद्राचे विश्वस्त इंजिनिअर लक्ष्मीकांत वाघावकर यांनी लिहिलेल्या ‘सहज आठवलं’ या पुस्तकाचे प्रकाशन शनिवारी (ता. २१) डॉ. बेलसरे यांच्या हस्ते महाराष्ट्र अभियांत्रिकी संशोधन संस्था(मेरी) येथील नगरकर सभागृहात करण्यात आले.

त्या वेळी ते बोलत होते. कार्यक्रमास विदर्भ पाटबंधारे विकास महामंडळाचे माजी कार्यकारी संचालक राजेंद्र शुक्ल, सेवानिवृत्त मुख्य अभियंता व साहित्यिक इंजिनिअर विलास शेळके, छाया देवांग, वाघाड प्रकल्पस्तरीय पाणी वापर संस्थेचे संचालक शहाजी सोमवंशी, प्रवीण जोंधळे आदींची प्रमुख उपस्थिती होती.

डॉ. बेलसरे म्हणाले, की प्रकल्पाच्या माध्यमातून पाणी वापर संस्थांचे काम उभे राहत असताना शेतकऱ्यांना सोबत घेऊन वाघावकर यांनी आदर्श पद्धतीने कामकाज केले. त्यामुळे अनेकांच्या मदतीने येथे पाणी वापर संस्थांची चळवळ सक्षम झालेली दिसते.

पाणी वापर संस्थेचे प्रणेते समाज परिवर्तन केंद्राचे संस्थापक स्वातंत्र्यसैनिक व माजी आमदार स्व. वसंत (बापू) उपाध्ये, स्व. भरतभाऊ कावळे, शहाजी सोमवंशी, रामनाथ वाबळे, मुरलीधर अकर, राजाभाऊ कुलकर्णी आणि वाघावकर आणि त्यांच्या सहकाऱ्यांनी काम केले. त्यांचे पाणी संस्था सक्षमीकरणाचे प्रयत्न, पाठपुरावा, परिश्रम, पुरस्कार, सद्यःस्थितीची माहिती यात विस्ताराने वाचावयास मिळते, असे त्यांनी सांगितले.