Hospital Facility : मोहोळमध्ये उपजिल्हा रुग्णालयात सुधिवांचा अभाव

Solapur News : मोहोळ येथील ग्रामीण रुग्णालयाला उपजिल्हा रुग्णालयाचा दर्जा मिळूनही परिस्थिती ‘जैसे-थे’च आहे. रुग्णालयात पाण्याची अत्यंत अडचण असून, शवविच्छेदन केलेला मृतदेह धुण्यासाठीही पाणी विकत घ्यावे लागते. पाण्यासह या रुग्णालयात अनेक सोयीसुविधांचा अभाव आहे. वैद्यकीय अधिकारीही नाहीत, एकाच तात्पुरत्या स्वरूपात नेमलेल्या वैद्यकीय अधिकाऱ्यावर ताण येत आहे. त्यामुळे हे रुग्णालय असून अडचण नसून खोळंबा अशी अवस्था झाली आहे.

मोहोळ हा अपघाती परिसर म्हणून ओळखला जातो. त्यामुळे अपघातातील जखमींवर तात्पुरत्या स्वरूपात उपचार करून त्याला पुढील उपचारासाठी सोलापूरला पाठवावे लागते. या रुग्णालयासाठी वैद्यकीय अधिकाऱ्यांची तीन पदे मंजूर आहेत. त्यापैकी दोन पदे भरली आहेत. परंतु दोघेही गेल्या चार महिन्यांपासून वैद्यकीय रजेवर आहेत. दररोजच्या कामकाजात अडचण येऊ नये म्हणून तात्पुरत्या स्वरूपात वैद्यकीय अधिकाऱ्याची नेमणूक केली आहे, त्यावरच पूर्ण रुग्णालयाचा कारभार सध्या सुरू आहे.

या रुग्णालयात अधिपरिचारकांची सात पदे मंजूर आहेत, त्यापैकी चार रिक्त आहेत. या रुग्णालयात दररोजची ओपीडी २०० ते ३०० एवढी आहे. तर रुग्णालयात विविध आजारांच्या उपचारासाठी दाखल होणाऱ्या रुग्णांची दररोजची संख्या ही २५ ते ३० एवढी आहे. त्यामुळे दररोजच्या कामकाजात अडचणी येत आहेत. मोहोळ शहर परिसरात अपघात झाला व त्यात एखादी व्यक्ती मरण पावली तसेच अन्य कारणाने मृत्यू झालेल्या दोन-तीन व्यक्तींचे मृतदेह उत्तरीय तपासणीसाठी दररोज मोहोळला येतात. मृतदेहाच्या उत्तरीय तपासणी अगोदर मृतदेह धुण्यासाठी पाण्याची व्यवस्था करावी लागते. गेल्या दोन महिन्यांपासून शहरात पाणीटंचाई असल्याने रुग्णालयालाही पाणीटंचाईचा सामना करावा लागत आहे.

पाण्याच्या अडचणीबाबत नगरपरिषद व तहसील प्रशासन यांच्याकडे रुग्णालय प्रशासनाने वेळोवेळी पाठपुरावा व पत्रव्यवहार केला आहे, मागणीही केली आहे; परंतु त्याची कोणीही दखल घेतली नाही. त्यामुळे रुग्णालयासमोर मोठ्या अडचणी निर्माण होत आहेत.