Maharashtra Kesari : राज्य कुस्तीगीर परिषद घेणार कर्जतला ‘महाराष्ट्र केसरी’ स्पर्धा

Ahilyanagar News : राज्य कुस्तीगीर महासंघाने अहिल्यानगरला ‘महाराष्ट्र केसरी’ कुस्ती स्पर्धा घेतल्यानंतर आता राज्य कुस्तीगीर परिषदही महाराष्ट्र केसरी कुस्ती स्पर्धा अहिल्यानगर जिल्ह्यातच घेत आहे.

कर्जत येथे आमदार रोहित पवार यांच्या पुढाकाराने २७ ते ३० मार्च दरम्यान ही स्पर्धा होत असून त्याची तयारी सुरू झाली आहे. स्पर्धेसाठी राज्यातून ९०० मल्ल, दोनशे पंचांसह पदाधिकारी मिळून सुमारे बाराशे लोकांचा राबता असेल, असे सांगण्यात आले.

महाराष्ट्राच्या मातीमधील कुस्ती या अस्सल खेळाच्या प्रतिष्ठेसाठी मामासाहेब मोहोळ यांनी राज्य कुस्तीगीर परिषद स्थापन करुन ‘महाराष्ट्र केसरी’ हा राज्यातील कस्तीमधील सर्वोच्च किताब सुरू केला. सुरुवातीला रोख बक्षीस व १९८२ पासून मामासाहेब मोहोळ कुटुंबाकडून विजेत्याला १.५ किलोग्रॅम वजनाची चांदीची गदा देऊ लागले.

२००८ पासून गदेसह ५१ हजारांचे रोख बक्षीस सुरू झाले व त्यात पुढे वाढ होत गेली. विजेत्यांना क्रीडा कोट्यातून सरकारी नोकऱ्या दिल्या जाऊ लागल्या. अलीकडच्या काही वर्षांपासून मात्र संघटनेत आणि पर्यायाने महाराष्ट्र केसरी कुस्ती स्पर्धेत राजकारण सुरू झाले.

राज्य पातळीवर परिषदेला समकक्ष महासंघ स्थापन झाला आहे. त्यामुळे गेल्या काही वर्षांपासून दोन वेगवेगळ्या महाराष्ट्र केसरी कुस्ती स्पर्धा होऊ लागल्या आहेत. महाराष्ट्र राज्य कुस्तीगीर परिषद व महाराष्ट्र राज्य आॅलिंपिक असोसिएशनच्या मान्यतेने कर्जत तालुका तालीम संघाकडून कर्जत (जि. अहिल्यानगर) येथे आमदार रोहित पवार यांच्या पुढाकाराने ‘महाराष्ट्र केसरी’ कुस्ती स्पर्धा होत असल्याचे जाहीर केले आहे. बक्षीस वितरणाला ज्येष्ठनेते शरद पवार यांना उपस्थित राहता यावे त्या दृष्टीच्या नियोजनानुसार २७ ते ३० मार्च या काळात ही स्पर्धा होईल.

स्पर्धा नेमकी कितवी

अहिल्यानगर येथे नुकतीच ६७ महाराष्ट्र केसरी कुस्ती स्पर्धा झाल्याचे राज्य कुस्तीगीर महासंघाने जाहीर केले. आता कर्जत (जि. अहिल्यानगर) येथे होत असलेली ही स्पर्धा ६६ वी असल्याचे सांगितले जात आहे. त्यामुळे स्पर्धा नेमकी कितवी. असा प्रश्‍न पडला आहे.