Jowar Crop : हुरड्यासाठीची ज्वारी बहरात

Chh. Sambhajinagar News : जिल्ह्यातील छत्रपती संभाजीनगर, गंगापूर, पैठण व खुलताबाद आदी तालुक्यांत कमी अधिक प्रमाणात सुमारे १२०० ते १५०० हेक्टर दरम्यान हुरड्यासाठीच्या ज्वारीची लागवड झाली आहे. आजवर पोषक स्थिती असल्याने ही ज्वारी चांगलीच बहरात आहे. दुसरीकडे हुरडा पार्ट्यांनाही विविध भागांत जोर पकडला आहे.

गंगापूर तालुक्यातील सारंगपूर व नरसापुर हे हुरडयासाठीच्या ज्वारीचे मुख्य केंद्र आहेत. सुरती, गुळभेंडी हे दोन वाण शेतकरी प्राधान्याने लागवडीसाठी घेतात. हुरड्यासाठी प्रीमॅच्युअर काढणी होते व ओलावा जास्त असल्याने जास्त काळ साठवता येत नाही. कृषी विभाग व आत्मच्या माध्यमातून हुरडा उत्पादक शेतकऱ्यांना सोबत घेऊन हुरड्याचे अधिक काळासाठी संवर्धन करता येईल का? याविषयी प्रयत्न झाले.

परंतु त्यामध्ये फारसे यश आले नसल्याने शेतकरी पारंपरिक पद्धतीने हुरडा तयार करून त्याची विक्री करण्याची तंत्र अवलंबत आहेत. साधारण गोकुळाष्टमी (ऑगस्ट दुसरा पंधरवडा) ते ऑक्टोबरपर्यंत हुरड्याच्या ज्वारी पेरली जाते. काही शेतकऱ्यांनी तर अलीकडे नोव्हेंबरमध्येही हुरड्यासाठीच्या ज्वारीची पेरणी केली. सध्याची पीक परिस्थिती एकदम चांगली आहे. सध्या टप्प्याटप्प्याने हुरड्याची काढणी आणि विक्री सुरू झाली आहे.

दीपावलीनंतर हंगामाला सुरुवात झाली. एका एकरला सरासरी ५०० ते ६०० किलो हुरडा उत्पादन होते. सद्यःस्थितीत हुरड्याला ३५० रुपये प्रति किलोचा दर मिळतो आहे. सरासरी दर दीडशे रुपये जरी पकडला तरी एकरी ७० ते ७५ हजार रुपये उत्पन्न मिळत. त्यासाठी १५ ते २० हजार एकरी खर्च होतात असं उत्पादक शेतकरी सांगतात. यंदा शेतकऱ्यांनी हुरडा ज्वारीच्या लागवडीचे केलेले टप्पे लक्षात घेता.

यंदा हंगाम फेब्रुवारी किंवा मार्चपर्यंत चालेल असा अंदाज आहे. सामान्यतः सारंगपूर, नरसापूर शिवारातील हुरड्याला अमरावती, नागपूर, चंद्रपूर, अकोला, सोलापूर, पंढरपूर, फलटण, अकलूज, बार्शी, जालना, नाशिक, शिर्डी, शिरूर, पुणे आदी ठिकाणांवरून मोठी मागणी असल्याची माहिती हुरडासाठी लागणाऱ्या ज्वारीचे उत्पादक तसेच हुरडा डेपो चालवणारे शेतकरी अण्णासाहेब शिंदे यांनी दिली.