Latur News : संयुक्त खाते असलेल्या जमिनीवरून अ‍ॅग्रीस्टॅकची नोंदणी करुन फार्मर आयडी घेताना शेतकरी वैतागले आहेत. खात्यातील एका शेतकऱ्यांची नोंदणी करताना जमिनीची पूर्ण पडताळणी (ऑल लँड व्हेरीफाय) झाल्यास नोंदणी राहिलेल्या शेतकऱ्यांची अडचण होत आहे. या शेतकऱ्यांचे नाव जमीनधारक यादीत येत नसल्याचे चित्र आहे.
यामुळे एकाची करणी अन् दुसऱ्याची होईना नोंदणी, अशी स्थिती झाली आहे. सन २०२३ नंतर खरेदी विक्री, वाटणी व अन्य व्यवहारातून नावावर जमीन झालेल्या अनेक शेतकऱ्यांची नावेही जमीनधारक म्हणून दिसत नसल्याची स्थिती आहे. लवकरच हा डेटा अ‍ॅग्रीस्टॅकवर अपलोड होणार असल्याची माहिती सूत्रांनी दिली.
जिल्ह्यात काही महिन्यापासून अ‍ॅग्रीस्टॅकवर शेतकऱ्यांच्या नोंदणीचे काम वेगाने सुरु आहे. नोंदणी होऊन फार्मर आयडी मिळाला तरच पीएम किसान योजनेसह अन्य योजनांचा लाभ शेतकऱ्यांना मिळणार आहे. यामुळे गाव पातळीवरील तलाठ्यापासून सर्व यंत्रणा शेतकऱ्यांच्या अॅग्रीस्टॅकवरील नोंदणीसाठी धावपळ करताना दिसत आहे.
या स्थितीत अजूनही हे काम शंभर टक्के पूर्ण झालेले नाही. जिल्ह्यात आतापर्यंत तीन लाख ४१ हजार ३७९ शेतकऱ्यांची अ‍ॅग्रीस्टॅकवर नोंदणी झाल्याची माहिती योजनेचे मास्टर ट्रेनर गणेश भारती यांनी दिली. काही जमिनीचा डेटा अपडोड झाला नसल्याने अडचणी येत असल्या तरी त्या बऱ्यापैकी सुटल्याचे श्री. भारती यांनी सांगितले.
पीएम किसानवर अपलोड असलेल्या फेब्रुवारी २०१९ मधील शेतकरी व त्यांच्या जमिनीच्या तपशीलावरुन अॅग्रीस्टॅकवरील नोंदणी सुलभ झाली. त्यानंतर फेब्रुवारी २०२३ पर्यंतचा तपशील अपडेट करण्यात आला. त्यासाठी थोडा वेळ लागला. सध्या २०२३ नंतर विविध प्रकारच्या माध्यमातून नावावर झालेल्या जमिनी अॅग्रीस्टेकच्या बकेट लिस्टमध्ये दिसत नाहीत.
राज्यभरातून याबाबत तक्रारी आल्यानंतर हा डेटा लवकरच अपलोड करण्याचा निर्णय झाला आहे. हा डेटा अपलोड झाल्यानंतर लागलीच राहिलेल्या शेतकऱ्यांची अॅग्रीस्टॅक नोंदणी होईल. या लहानमोठ्या समस्या तातडीने दूर करून शेतकऱ्यांची अॅग्रीस्टॅक नोंदणी करण्यात येत असल्याचेही भारती यांनी सांगितले.
तलाठ्यांनाही दुरुस्ती शक्य
संयुक्त खात्याच्याबाबतीत खात्यातील काही शेतकऱ्यांची नावे जमिनधारकाच्या यादीत दिसत नसतील तर त्यांना ही दुरुस्ती करता येईल. जमिनीची पडताळणी करताना नोंदणी न झालेल्या शेतकऱ्यांच्या तपशील बाजूला होतो.
अशा वेळी संबंधित शेतकऱ्यांनी तलाठ्याशी संपर्क साधून नाव दिसत नसल्याची माहिती दिल्यास त्यांच्याकडून कार्यवाही करता येईल. दरम्यान अज्ञान पालनकर्ता, वादग्रस्त व देवस्थानच्या जमिनीसाठी अॅग्रीस्टॅक नोंदणी करण्याचे आदेश नसल्याचेही भारती यांनी स्पष्ट केले.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.