Amaravati News : आंबिया बहारातील फळ नुकसानीच्या भरपाईस सातत्याने टाळाटाळ करणाऱ्या रिलायन्स कंपनीविरोधात खुद्द केंद्रीय मंत्री नितीन गडकरी यांनी भूमिका घेतल्यानंतर कृषी विभागाकडून कायदेशीर कारवाई करण्यासंबंधी चाचपणी केली जात आहे.
त्याकरिता विधी तज्ज्ञांचा सल्ला घेण्यात आला आहे. पहिल्या टप्प्यात नोटीस बजावल्यानंतर कंपनी सकारात्मक नसल्यास गुन्हा दाखल केला जाईल, असे कृषी विभागाच्या वरिष्ठ अधिकाऱ्यांनी सांगितले.
अमरावती जिल्ह्यात विमा योजनेच्या अंमलबजावणीसाठी रिलायन्स कंपनीची नियुक्‍ती करण्यात आली आहे. परंतु कंपनीकडून सातत्याने कारण सांगत भरपाईस टाळाटाळ केली जात आहे. त्यामुळे कृषी विभागाची डोकेदुखी वाढली आहे. संत्रापट्टयात हवामान आधारित चार ट्रिगर तर गारपीटसाठी अतिरिक्‍त विमा हप्ता भरून स्वतंत्र ट्रिगर निश्‍चित करण्यात आले आहे.
त्यानुसार पाच पैकी कमी तापमान आणि ३० मिलिमीटर पाऊस गेल्यावर्षी होता. या दोन ट्रिगरसाठी १४ मंडलांत भरपाईपोटी ८ कोटी रुपयांचा निधी मंजूर करण्यात आला. यापैकी हिवरखेड आणि मोर्शी या दोन मंडलांतच चार कोटी रुपयांची भरपाई देण्यात आली. उर्वरित १२ मंडलांमधील पावसाच्या आकडेवारीवर रिलायन्स कंपनीकडून ३ कोटी ९८ लाख रुपयांचा परतावा देण्यास कंपनी टाळाटाळ करीत आहे.
पावसाच्या आकडेवारीवर आक्षेप घेत विमा परतावा देण्यास कंपनी तयार नाही. याबाबत आमदार बच्चू कडू, देवेंद्र भुयार, राज्यसभेचे सदस्य डॉ. अनिल बोंडे यांच्याकडे शेतकऱ्यांनी तक्रारी केल्या. लोकप्रतिनिधींनी ही बाब केंद्रीय मंत्री गडकरी यांच्या कानावर घातली. त्यांनी थेट रिलायन्स कंपनीला पत्र लिहीत विमा भरपाई देण्याच्या सूचना केल्या आहेत.
...असे आहेत ट्रिगर
एक डिसेंबर ते १५ जानेवारी या कालावधीत ३० मिलिमीटर पाऊस झाल्यास हेक्‍टरी २० हजार रुपये. १५ जानेवारी ते ३१ फेब्रुवारी या कालावधीत १२ अंश सेल्सिअस तापमान राहिल्यास २० हजार रुपये, १ ते ३१ मार्च या कालावधीत सलग तीन दिवस ४० अंश सेल्सिअस किंवा त्यापेक्षा जास्त तापमान असल्यास २० हजार रुपये, १ एप्रिल ते ३१ मे दरम्यान सलग तीन दिवस ४५ अंश सेल्सिअस तापमानासाठी २० हजार रुपये देण्याची तरतूद आहे. १३३३ रुपये भरून १ जानेवारी ते ३० एप्रिल या कालावधीतील गारपिटीसाठी २६ हजार ६६७ रुपये मिळतात.
ॲग्रोवनचे सदस्य व्हा
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.