Insurance Scheme : राज्यातील शेडनेटधारकांसाठी लवकरच विमा योजना : उपमुख्यमंत्री फडणवीस

Nagpur News : वादळी वाऱ्यासह अतिवृष्टीमुळे शेडनेटधारकांचे नुकसान होते. त्या पार्श्‍वभूमीवर लवकरच अशा नुकसानग्रस्तांना संरक्षण मिळावे याकरिता विमा योजना प्रस्तावीत करण्यात आली आहे. त्याचा ड्राफ्ट अंतिम करण्याचे काम सुरू असून, यामध्ये लाभार्थी आणि शासनाला प्रीमियम थोडा जादा भरावा लागेल, अशी माहिती उपमुख्यमंत्री देवेंद्र फडणवीस यांनी विधान परिषदेत गुरुवारी (ता.७) दिली.

हिवाळी अधिवेशनाच्या पहिल्याच दिवसाच्या कामकाजात या संदर्भातील प्रश्‍न विरोधी पक्षनेते अंबादास दानवे यांनी उपस्थित केला होता. दानवे म्हणाले, ‘‘मॉन्सूनोत्तर पावसामुळे २२ जिल्ह्यांत साडेचार लाख हेक्‍टर नुकसान झाले.

त्यांना शासनाने वाऱ्यावर सोडले. सत्ताधारी केवळ सरकार शेतकऱ्यांच्या पाठीशी असल्याचे सांगून मोकळे होत आहे. शेडनेट उभारणीवर पाच ते २५ लाख रुपयांचा खर्च होतो. नुकसान झाल्यानंतर भरपाईची सोय नसल्याने शेतकरी हवालदिल झाले आहेत.

त्याकरिता विमा योजना असावी. त्यावर उपमुख्यमंत्री देवेंद्र फडणवीस यांनी उत्तर दिले. ते म्हणाले, की मंत्रिमंडळ बैठकीत यापूर्वीच याचा निर्णय झाला आहे. मुख्यमंत्री एकनाथ शिंदे यांनी यासाठी खास विमा संरक्षण योजना प्रस्तावीत करण्याची सूचना केली आहे.

ती अंतिम टप्प्यात असून यामध्ये विमा हप्ता मात्र अधिक असणार आहे. पशुधनासाठी देखील विमा संरक्षण योजना असावी, अशी मागणी अंबादास दानवे यांनी केली. त्यानंतरच्या कामकाजात उपसभापती डॉ. नीलम गोऱ्हे यांनी तालिका सभापती डॉ. निरंजन डावखरे, अनिकेत तटकरे, नरेंद्र दराडे, धीरज लिंगाडे यांच्या निवडीची घोषणा केली. विधान परिषद सदस्य राजेश राठोड यांच्या संरक्षणाच्या मुद्द्यावरही सभागृहात चर्चा झाली. त्यानंतर शोकप्रस्ताव मांडून कामकाज शुक्रवार (ता.८) पर्यंत स्थगित करण्यात आले.

चित्रपटांना देणार संरक्षण

प्रसाद खांडेकर हास्यजत्रा अभिनेता, त्याचा सिनेमा येत आहे. मात्र चित्रपटसृष्टीतील माफिया त्याला चित्रपटगृह मिळू देत नाहीत, असा मुद्दा मांडण्यात आला. या प्रकरणी गरज भासल्यास फौजदारी कारवाई केली जाईल, असे उत्तर उपमुख्यमंत्री देवेंद्र फडणवीस यांनी दिले.