Vima Bharpai: विमा भरपाईचे २५४६ कोटी रुपये ३० एप्रिलपर्यंत शेतकऱ्यांच्या खात्यात जमा

Pune News: खरिप हंगाम २०२४ मधील पीक विम्याची भरपाई शेतकऱ्यांच्या खात्यात जमा करण्याचे काम सुरु आहे. शेतकऱ्यांच्या खात्यात ३० एप्रिलपर्यंत विमा कंपन्यांनी २ हजार ५४६ कोटी रुपये जमा झाले. तर अजून ७१९ कोटी रुपये जमा करण्याचे काम सुरु आहे. ३० एप्रिलपर्यंत ३ हजार २६५ कोटी रुपयांची भरपाई मंजूर झाली. त्यात आणखी वाढ होऊ शकते, असे कृषी विभागाने सांगितले.

खरिप हंगाम २०२४ मधील पीक नुकसानीपोटी राज्यातील २९ जिल्ह्यांमधील शेतकऱ्यांना चार ट्रीगरमधून भरपाई मंजूर झाली आहे. त्यात स्थानिक नैसर्गिक आपत्ती, हंगामातील प्रतिकूल परिस्थिी, काढणी पश्चात नुकसान भरपाई आणि पीक कापणी प्रयोगावर आधारित भरपाई निश्चित झाली आहे. एकाच जिल्ह्यात चारही ट्रीगरमधून भरपाई मंजूर झाली असे नाही. काही जिल्ह्यांमध्ये एका ट्रीगरमधून तर काही जिल्ह्यांमध्ये तीन ट्रीगरमधून भरपाई मंजूर आहे.

राज्य सरकारने विम्याचा आपल्या हिस्स्याचा पहीला हप्ता दिल्यामुळे सध्या शेतकऱ्यांच्या खात्यात केवळ स्थानिक नैसर्गिक आपत्ती आणि हंगामातील प्रतिकूल परिस्थिती या दोन ट्रीगरमधून भरपाई जमा होत आहे. या दोन ट्रीगरमधून ३० एप्रिलपर्यंत ३ हजार २६५ कोटी रुपयांची भरपाई मंजूर झाली. त्यात स्थानिक नैसर्गिक आपत्ती या ट्रीगरमधून २ हजार ५५२ कोटी रुपये मंजूर झाले. तर ७१३ कोटी रुपयांची भरपाई मंजूर झाली.

मंजूर झालेल्या एकूण भरपाईपैकी ३० एप्रिलपर्यंत राज्यातील शेतकऱ्यांच्या खात्यात २ हजार ५४६ कोटी रुपये विमा कंपन्यांनी जमा केले. तर ७१९ कोटी रुपयांची भरपाई जमा करण्याचे काम सुरु आहे. स्थानिक नैसर्गिक आपत्तीमधून मंजूर झालेल्या २ हजार ५५३ कोटी रुपयांमधून १ हजार ८४४ कोटी रुपये जमा झाले. तर हंगामातील प्रतिकूल परिस्थिती या ट्रीगरमधून मंजूर झालेल्या ७१२ कोटी रुपयांपैकी ७०१ कोटी रुपये शेतकऱ्यांच्या खात्यात ३० एप्रिलपर्यंत जमा झाले.

तीन जिल्ह्यात अग्रीम

हंगामातील प्रतिकूल परिस्थिती या ट्रीगरमधून तीन जिल्ह्यांमध्ये अग्रीम भरपाई मंजूर झाली. नांदेड, परभणी आणि हिंगोली या तीन जिल्ह्यांमध्ये ७१२ कोटी रुपयांची अग्रीम भरपाई मंजूर आहे. परभणी जिल्ह्यात २९९ कोटी रुपयांची अग्रिम भरपाई मंजूर झाली. तर नांदेड जिल्ह्यात २५८ कोटी आणि हिंगोली जिल्ह्यात १५४ कोटी रुपयांची अग्रीम भरपाई मंजूर आहे.