Health Institute Adoption : दर्जेदार उपचारांसाठी ‘दत्तक आरोग्य संस्था’ योजना

Amaravati News : सार्वजनिक आरोग्य विभागांतर्गत येणाऱ्या सरकारी रुग्णालयात उपचारासाठी दाखल होणाऱ्या रुग्णांना दर्जेदार आरोग्य सुविधा मिळाव्या, यासाठी वैद्यकीय अधिकाऱ्यांना आरोग्य संस्था दत्तक देण्याची आगळीवेगळी संकल्पना राबविण्यात येणार असल्याची माहिती आरोग्यमंत्री प्रकाश आबिटकर यांनी दिली.

सार्वजनिक आरोग्य विभागांतर्गत मोठ्या प्रमाणावर गट ‘अ’ व ‘ब’ तसेच विशेषज्ञ संवर्गातील वैद्यकीय अधिकारी कार्यरत आहेत. प्रशासकीय बाब म्हणून राज्यातील विविध ठिकाणी त्यांच्या पदस्थापना, पदोन्नती होत असतात. वैद्यकीय अधिकारी आपल्या सेवाकाळात एकापेक्षा अधिक ठिकाणी सेवा बजावतात, पण अधिकारी पहिल्यांदा जिथे नोकरीला लागतात त्या जागेविषयी वेगळी अन् आपलेपणाची भावना मनात असते.

हाच धागा पकडून पहिल्या नोकरीचे ठिकाण अधिकाऱ्यांनी दत्तक घेतले तर त्या आरोग्यकेंद्र, रुग्णालयात गुणात्मक बदल अधिकारी घडवून आणू शकतील हा विचार आरोग्यमंत्री यांनी मांडला आणि तो यशस्वी करण्यासाठी राज्यभर ही आगळीवेगळी संकल्पना राबविण्यात येणार आहे.

दत्तक घेतलेल्या आरोग्य केंद्रांमध्ये आहारसेवा कशी आहे, नियमित प्रशिक्षण दिले जाते का, आरोग्य केंद्राच्या इमारतीची अवस्था कशी आहे, रुग्णवाहिका उपलब्ध आहे का, बायोमेडिकल वेस्टची विल्हेवाट योग्य पद्धतीने लावली जाते की नाही, प्रसूती वॉर्ड, ऑपरेशन थिएटरची स्थिती कशी आहे, लसीकरण नियमित होते का, अग्निशमन उपकरणांची स्थिती, प्रसाधनगृहांची स्थिती, बायोमेट्रिक हजेरीनुसार कर्मचाऱ्यांचे वेतन होते का, याकडेही अधिकाऱ्यांना लक्ष द्यावे लागणार आहे.

पहिल्या टप्प्यात जिल्हा आरोग्य अधिकारी, जिल्हा शल्यचिकित्सक, आरोग्य उपसंचालक व सहसंचालक दर्जाचे अधिकारी आरोग्यकेंद्रे दत्तक घेतील. त्यानंतर वैद्यकीय अधिकाऱ्यांना ही जबाबदारी दिली जाईल. त्यामुळे आरोग्यमंत्र्यांची ही संकल्पना वैद्यकीय अधिकारी किती यशस्वी करतात, याकडे सर्वांचेच लक्ष आहे.