Snails Issue : वरूड बगाजी गावात गोगलगायींचा प्रादुर्भाव

Amravati News : धामणगाव रेल्वे तालुक्यातील निम्न वर्धा प्रकल्पाच्या बगाजी सागर धरणाजवळ असलेल्या वरूड बगाजी येथील ग्रामस्थ गोगलगायींमुळे त्रस्त झाले आहेत. शेतात, प्रत्येक घरी, दारोदारी गोगलगायींचे साम्राज्य पसरले आहे. दरम्यान, कीटकनाशके वापरून सुद्धा गोगलगायींचे प्रमाण कमी झाले नाही. त्यामुळे ग्रामस्थांची चिंता वाढली आहे.

वरूड बगाजी गावात घरोघरी गोगलगायी निघत आहेत. शेतांतून गोगलगायींनी शिरकाव केला. परंतु आता तर पूर्ण गावातच रस्त्याने, भिंतीवर, झाडावर व जिकडे तिकडे गोगलगायी झाल्याने गावकरी त्रस्त झाले आहेत. आता कीटकनाशके वापरून सुद्धा गोगलगायींचे प्रमाण काही कमी झाले नाही. यासाठी काय उपाय करावे काही समजत नाही, असा प्रश्‍न ग्रामस्थांना पडला आहे. या गोगलगायींमुळे सर्व जण त्रस्त झाले आहेत.