Soybean Pest infestation : सोयाबीनवर पाने, शेंगा खाणाऱ्या अळीचा प्रादुर्भाव

Nanded News : नांदेड जिल्ह्यात सध्या पावसाने उघडीप दिल्यानंतर पिकांवर कीडी व रोगांचा प्रादुर्भाव मोठ्या प्रमाणात आढळून येत आहे. सोयाबीनवर पाने तसेच शेंगा खाणाऱ्या अळीचा प्रादुर्भाव झाला आहे. तर कपाशीवरही रसशोषण करणाऱ्या कीडींचे प्रमाण अधीक दिसून येत आहे. यासाठी शेतकरी कीडनाशकांची फवारणी करत आहेत. परंतु या कीडी कीटकनाशकांनाही प्रतिसाद देत नसल्याचे शेतकरी सांगत आहेत.

नांदेड जिल्ह्यात मागील महिना-दीड महिन्यापासून पावसाने संततधार हजेरी लावली आहे. या पावसामुळे वखरणी, कोळपणी, निदंणी अशी आंतरमशागतीची कामे ठप्प झाली होती. परिणामी पिकांत तण वाढले, तसेच कीडी व रोगांचा प्रादुर्भावही मोठ्या प्रमाणात वाढला. सोयाबीनवर पाने खाणारी तसेच शेंगा पोखरणाऱ्या अळीचा मोठ्या प्रमाणात शिरकाव झाल्याचे दिसून येत आहे.

अळीचे प्रमाण अधिक असल्याने एका दिवसात सोयाबीनच्या शेंगा या अळ्या फस्त करीत आहेत. यासाठी शेतकरी महागडी कीटकनाशके फवारत आहेत. पंरतु या अशांचा बंदोबस्त होत नसल्याचे शेतकरी सांगत आहेत. याबरोबरच कपशीवरही रस शोषणाऱ्या कीडींचा प्रादुर्भाव आढळून आला आहे. यामुळे कपाशीची पाने पिवळी, लाल पडून ते गळून पडत आहेत.

यासाठी शेतकरी कीडनाशकाची फवारणी करत आहेत. तसेच सततच्या पावसामुळेही कपाशीची झाडे उन्मळून पडत आहेत. मागील दोन दिवसांपासून पावसाने विश्रांती घेतल्यामुळे शेतकरी कपाशी, सोयाबीन, तूर, हळद या पिकांवर कीड व रोगांच्या बंदोबस्तासाठी फवारणीची कामे करत आहेत. तर काही शेतकरी निदंणी, वखरणी यासारखी आंतरमशागतीच्या कामात व्यग्र आहेत.