PM Narendra Modi : भारत जगात सर्वांत वेगाने वाढणारी अर्थव्यवस्था : मोदी

New York News : ‘‘येत्या काही काळातच भारत हा जगातील तिसरी मोठी अर्थव्यवस्था बनणार आहे. आमचा देश हा जगातील सर्वांत वेगाने वाढणारी अर्थव्यवस्था आहे.

त्यामुळे आमच्या या विकासगाथेचा अमेरिकेतील तंत्रज्ञान कंपन्यांनी लाभ उठवावा,’’ असे आवाहन पंतप्रधान नरेंद्र मोदी यांनी सोमवारी (ता. २३) केले. मोदी यांनी अमेरिकेतील काही बड्या तंत्रज्ञान कंपन्यांच्या मुख्य कार्यकारी अधिकाऱ्यांची भेट घेत त्यांच्याशी चर्चा केली.

मोदी म्हणाले, ‘‘अमेरिका, चीन, जर्मनी आणि जपाननंतर भारत हा सध्या जगातील पाचवी अर्थव्यवस्था आहे. ‘जीडीपी’ ३.९ ट्रिलियन डॉलर आहे. सलग तिसऱ्या वर्षी विकासाचा वेग सात टक्क्यांहून अधिक राहिला आहे.

आमच्या सरकारच्या तिसऱ्या कार्यकाळात भारताला तिसऱ्या क्रमांकाची अर्थव्यवस्था बनविण्यासाठी पूर्ण प्रयत्न करत आहोत.

त्यामुळे सहविकास, सहरचना आणि सहनिर्मिती या माध्यमातून भारताशी सहकार्य व गुंतवणूक करत बड्या कंपन्यांनी आमच्या विकासगाथेचा लाभ उठवावा. भारताच्या आर्थिक आणि तंत्रज्ञान क्षेत्रातील प्रगतीतून अनेक संधी निर्माण होत आहेत.’’