E-Peek Pahani : ‘ई-पीकपाहणी’साठी सर्व्हरची क्षमता वाढविली

Pune News : ई-पीकपाहणी करताना उद्‌भविणाऱ्या तांत्रिक अडचणींमुळे राज्यातील शेतकरी हैराण झालेले आहेत. दरम्यान, आता सर्व्हरची क्षमता वाढविल्यामुळे तांत्रिक दोष दूर झाल्याचा दावा शासकीय अधिकाऱ्यांनी केला आहे.

खरीप हंगामाची ई-पीकपाहणी एक ऑगस्टपासून सुरू होत असल्याचे राज्य शासनाने घोषित केले. परंतु त्यासाठी लागणारी तांत्रिक पूर्वतयारी केली नाही. त्यामुळेच १० ते १२ ऑगस्टदरम्यान तीन दिवस पीकपाहणीचे काम बंद पडले. त्यामुळे राज्यभर गोंधळ उडाला. शेतकऱ्यांना या काळात भ्रमणध्वनीद्वारे ई-पीकपाहणी करता आली नाही. त्यासाठी दिलेले सरकारी उपयोजन (अॅप्लिकेशन) बंद पडले होते, असे कृषी विभागातील अधिकाऱ्यांचे म्हणणे आहे.

कापूस व सोयाबीन उत्पादकांना आर्थिक मदतीसाठी कृषी विभागाने ई-पीकपाहणी सक्तीची केली आहे. मात्र दुसऱ्या बाजूला महसूल विभागाच्या अनागोंदीमुळे पीकपाहणी करण्यात अडचणी आल्यास शेतकरी नाराज होतात. त्यातून ई-पीकपाहणीची अट काढून टाकण्याची मागणीदेखील होत असते, असे कृषी अधिकाऱ्यांचे म्हणणे आहे. दरम्यान, महसूल विभागाच्या सूत्रांनी सांगितले, की ई-पीकपाहणीत केवळ दोन दिवसांपुरता तांत्रिक दोष होता. तो आता हटविण्यात आल्या आहे. तसेच सर्व्हरची क्षमताही वाढविण्यात आली आहे. त्यामुळे राज्यभर ई-पीकपाहणी वेगात सुरू आहे. येत्या एक सप्टेंबरपर्यंत शेतकऱ्यांना ई-पीकपाहणी करता येईल.

राज्यात सध्या दोन प्रकारची ई-पीकपाहणी सुरू आहे. केंद्र शासनाच्या अखत्यारीत सुरू असलेल्या ई-पीकपाहणी ही डिजिटल क्रॉप सर्व्हे (डीसीएस) उपक्रमाचा भाग आहे. अर्थात, ही पाहणी केवळ ३५ तालुक्यांमधील २८०० गावांपुरती मर्यादित आहे. राज्यातील इतर ४१ हजारांहून अधिक गावांमध्ये राज्य शासनाची ई-पीकपाहणी स्वतंत्रपणे केली जात आहे. तांत्रिक दोष दूर झाल्यामुळे सध्या रोज एक ते दीड लाख शेतकरी ई-पीकपाहणी करीत आहेत, असा दावा महसूल विभागाच्या वरिष्ठ अधिकाऱ्याने सांगितले.