Pest Management : एकात्मिक कीड व्यवस्थापनात जैविक निविष्ठांचा वापर वाढवा

Solapur News : कमी खर्चातील आणि प्रभावी उपायांसाठी एकात्मिक कीड व्यवस्थापनात जैविक निविष्ठांचा वापर वाढवावा, असे आवाहन कृषी विज्ञान केंद्र, सोलापूरचे वरिष्ठ शास्त्रज्ञ व प्रमुख डॉ. लालासाहेब तांबडे यांनी केले.

कृषी विज्ञान केंद्र, सोलापूरच्या वतीने खरीप २०२३ कार्यक्रमांतर्गत नन्हेगाव (ता. अक्कलकोट) येथे सोयाबीन पिकातील एकात्मिक पद्धतीने कीड व्यवस्थापन याविषयी शेतकऱ्यांना माहिती देण्यासाठी आद्यरेखा प्रात्यक्षिकाचे आयोजन करण्यात आले होते. त्या वेळी डॉ. तांबडे बोलत होते. मल्लिनाथ आलुरे अध्यक्षस्थानी होते.

डॉ. तांबडे म्हणाले, की यंदा कृषी विज्ञान केंद्राच्या प्रात्यक्षिकामध्ये पिवळा मोझॅक रोगाचे प्रमाण कमी आढळून आले आहे. पण प्रभावी उपाययोजना आणि वेळेत काम होणे आवश्यक आहे. त्यासाठी एकात्मिक पद्धतीचे उपाय करताना जैविक उपाययोजना कधीही फायदेशीर ठरतात, असेही ते म्हणाले.

प्रास्ताविकात विषय विशेषज्ञ (पीक संरक्षण) समाधान जवळगे यांनी प्रात्यक्षिकांतर्गत दिलेल्या निविष्ठा व त्यामुळे किडींच्या प्रादुर्भावात कमी होणारे प्रमाण याविषयी माहिती दिली. प्रात्यक्षिकाचे लाभार्थी शांतप्पा आलुरे यांनी एकात्मिक कीड नियंत्रणाचे विविध घटक वापराचे महत्त्व सांगितले.

कामगंध सापळे, चिकट सापळे, जैविक कीटकनाशक नुमोरीय रिलाई, पक्षिथांबे इत्यादीचा वापर केल्याचे सांगितले. तसेच फवारण्याच्या संख्येमध्ये घट झाल्याचे सांगितले. त्यानंतर प्रत्यक्ष प्रक्षेत्राला भेट देण्यात आली व पिकाची पाहणी करण्यात आली. विषय विशेषज्ञ प्रदीप गोंजारी यांनी सूत्रसंचालन केले.