Sangli Rain Update: ‘कृष्णा’, ‘वारणा’च्या पाणी पातळीत वाढ

Sangali News: सांगली  जिल्ह्यात मॉन्सूनपूर्व पावसामुळे कृष्णा आणि वारणा नदीच्या पाण्याच्या पातळीत वाढ झाली आहे. सोमवारी (ता. २६) सकाळपासून पावसाने उघडीप दिली असली तरी, शेतात पाणी साचून राहिले आहे. दरम्यान, गेले दहा दिवस पाऊस सुरू असल्यामुळे ओढे, नाल्यांतून पाणी वाहत आहे. शेतीचे बांध पाण्याने भरले आहेत. या पावसाचा खरीप पिकांवर थेट परिणाम होणार आहे. सद्यःस्थितीत पेरण्या लांबणीवर गेल्या आहेत. फळबागांचेही नुकसान झाले आहे. काही ठिकाणी माती वाहून गेली आहे. एकंदरीत, अतिपावसाने शेतकऱ्यांचे आर्थिक गणित बिघडणार आहे.

जिल्ह्यात गेल्या दहा दिवसांपासून मॉन्सूनपूर्व पाऊस सुरू आहे. दहा दिवसांत १७४.२ मिलिमीटर पाऊस झाला. या पावसामुळे शेतकरी संकटात सापडला आहे. अनेक ठिकाणी शेतात पाणी साचून राहिले आहे. नुकसान टाळण्यासाठी शेतातून पाणी बाहेर काढण्यासाठी शेतकऱ्यांचा खटाटोप सुरू आहे. पावसामुळे फळबागांसह उन्हाळी पिकांना फटका बसल्याचे चित्र आहे. खानापूर, तासगाव, जत तालुक्यांतील अनेक गावांमध्ये पावसाने हजेरी लावली. खरीप हंगामाची तयारी करण्याचे सध्याचे दिवस आहेत.

शिराळा परिसरात मोठ्या प्रमाणात धूळवाफ भात पेरणी केली जाते. २५ मे हा पेरणीचा मुहूर्त असतो. मात्र, गेल्या १० दिवसांपासून सुरू असलेल्या पावसाने ही संधी हिरावली आहे. जोरदार पाऊस झाल्याने आता मशागती करण्यास अडथळा तयार झाला आहे. जमिनीचा वाफसा येण्यासाठी वाट पाहावी लागणार आहे.

नदीकाठच्या विजेवरील मोटारी काढल्या

कृष्णा, वारणा आदी नद्यांची पातळी पाच ते सात फुटांनी वाढली आहे. पाऊस अद्याप थांबलेला नाही. जोडूनच मोसमी पावसाचे आगमन होणार आहे. त्यामुळे पुरामध्ये मोटारी बुडू नयेत, यासाठी शेतकऱ्यांनी त्या काढून आणल्या आहेत. एक महिना आधीच शेतकऱ्यांनी सुरक्षित स्थळी मोटारी हलवल्या आहेत.

पाच राज्यमार्गांवरील वाहतूक बंद 

जिल्ह्यात गेल्या आठवड्यापासून मॉन्सूनपूर्व संततधार पाऊस सुरू असल्याने बहे, डिग्रज, सांगली आणि म्हैसाळ हे बंधारे पाण्याखाली गेले आहेत. तासगाव तालुक्यातील तीन व कडेगाव तालुक्यातील दोन राज्य मार्गावरील वाहतूक बंद केली असून पर्यायी मार्गाने वाहतूक सुरू असल्याची माहिती संबंधित विभागाने दिली आहे.