Broiler Lifting Rates : ब्रॉयलर पक्ष्याच्या लिफ्टिंग दरात वाढ

Amravati News : नवरात्रातील ९ दिवसांत ब्रॉयलर पक्ष्याच्या लिफ्टिंग दरात घट नोंदविण्यात आली होती. त्यात दिवाळीपासून तेजी आल्याने कुक्‍कुट व्यावसायिकांना दिलासा मिळाला आहे. ८७ ते ९० रुपयांवरून हे दर १०० ते १०५ रुपयांवर आल्याची माहिती कुक्‍कुट व्यावसायिक शुभम महाले यांनी दिली.

किरकोळ चिकन व्यावसायिक पोल्ट्री व्यावसायिकांकडून जिवंत पक्ष्यांची खरेदी करतात. नवरात्रातील दिवसांत मागणीत घट झाल्याचे कारणामुळे जिवंत कुक्‍कुट पक्ष्यांच्या लिफ्टिंग दरात मोठी घट नोंदविण्यात आली होती. सुमारे ८७ ते ९० रुपये प्रति किलो असा जिवंत पक्ष्यांचा दर होता.

आता मात्र हेच दर १०० ते १०५ रुपयांवर पोहोचले आहेत. दिवाळीच्या काळात मागणीत वाढ झाल्याने जिवंत पक्ष्यांचे दर १११ रुपये प्रती किलोपर्यंत गेले होते, असेही शुभम महाले यांनी सांगितले. किरकोळ विक्रेत्यांकडून चिकनची विक्री २७० ते २८० रुपये दराने होत आहे. सरासरी दोन किलो वजनाच्या जिवंत कोंबडीपासून ४५० ते ६०० ग्रॅमपर्यंत विनाकामाचे अवशेष मिळतात. ही एकप्रकारची घट असल्याने त्यामुळेच किरकोळ विक्रीचा दर हा अधिक असतो, असेही त्यांनी सांगितले.

सोयापेंड मका दरात घसरण

सोयापेंड आणि मक्‍याचा वापर पोल्ट्री फिडमध्ये केला जातो. दोन महिन्यांपूर्वी सोयापेंडचे दर ३८ रुपये किलोवर होते आता त्यात घट होऊन दर ३३ रुपयांवर आले आहेत. मका तीन हजार रुपयांवरून २२५० ते २३०० रुपयांवर आला आहे. परिणामी, उत्पादकता खर्चात कपात झाली आहे. सध्या उत्पादकता खर्च ७८ रुपयांवर आल्याचे श्री. महाले यांनी सांगितले.