Paddy Plantation : पालघरमध्ये भातलावणी अंतिम टप्प्यात

Mumbai News : पालघर जिल्ह्यात एकूण ७६ हजार ६४४ हेक्टर क्षेत्रावर भात लागवड करण्यात येते. सध्याच्या परिस्थितीत पाऊस चांगला असल्याने जवळपास ९५ टक्के भातलावणीची कामे पूर्ण झाली आहेत. पुढील दोन दिवसांत शंभर टक्के कामे पूर्ण होतील, असा अंदाज कृषी विभागाने वर्तविला आहे.

खरीप हंगामात भातशेती ही निव्वळ पावसाच्या पाण्यावर अवलंबून असते. जिल्ह्यातील शेतकऱ्यांचे हे एकमेव उत्पन्नाचे साधन आहे. शेतीलायक पाऊस झाला नाही, तर संपूर्ण वर्षाचे गणित बिघडते. उदरनिर्वाह, मुलांचे शिक्षण, आरोग्याचा विचार करता यंदा शेतकऱ्यांना अनेकदा वरुणराजाकडे साकडे घालण्याची वेळ आली आहे.

जून महिन्यात पावसाने उशिराने हजेरी लावली. पाऊस नियमित सुरू होईल, या आशेने शेतकऱ्यांनी भातबियाण्यांची पेरणी केली; परंतु नंतर वरुणराजाने पाठ फिरवल्यामुळे समप्रमाणात बियाण्यांची उगवण झाली नाही. काही शेतकऱ्यांवर दुबार पेरणीचे संकट आले. नंतरच्या कालावधीत जुलैअखेरीस मुसळधार पावसाने झोडपून काढले. भात लागवडीच्या प्रत्येक टप्प्यात पावसाचे संकट उभे राहिले आहे.

कृषी विभाग शेतकऱ्यांच्या मदतीसाठी

भातपिकाची विविध प्रात्यक्षिके

भात व नाचणी पिकासाठी शेतीशाळा

भातलागवडीनंतर येणाऱ्या कीडरोगाबाबत माहिती क्रॉपसॅपअंतर्गत नोंदवणे.

शेतकऱ्यांना शेतीसाठी आवश्यक यंत्रसामुग्री मिळवणेसाठी महाडीबीटी पोर्टलवर अर्ज करण्यास मदत करणे.

मजुरांची उपलब्धता

भातलावणीच्या पहिल्या टप्प्यात अल्पभूधारक शेतकऱ्यांनी भातलागवड पूर्ण केली आहे. त्यामुळे जास्त शेतजमीन असलेल्या शेतकऱ्यांना मुबलक प्रमाणात मजूर मिळत आहे. मजुरांच्या उपलब्धतेमुळे भातलागवडीच्या कामांना गती मिळाल्याने लावणीच्या कामांना अंतिम स्वरूप प्राप्त होण्याची शक्यता आहे.