Livestock Vaccination : पुढील तीन महिने पशुपालकांची चिंता वाढणार; प्रतिबंधात्मक लसीकरणचे पशुसंवर्धन आयुक्तांचे आवाहन

राज्यातील पशुपालकांनी लम्पी रोग, लाळ खुरकुत, पीपीआर, घटसर्प आणि फऱ्या रोग प्रतिबंध्यात्मक लसीकरण करून घ्यावं असं आवाहन पशूसंवर्धन आयुक्तक कौस्तुभ दिवेगावकर यांनी केलं आहे. पुढील तीन महीने जनावरांमध्ये विविध रोगांचा प्रादुर्भाव होण्याची शक्यता आहे. त्यामुळं पशु संवर्धन विभागानं सतर्कतेचा इशारा दिला आहे. वेळेत लसीकरण केले नाही तर जनावरांमध्ये विविध रोगांचा प्रादुर्भाव दिसतो. त्यामुळं पशुपालकाचं आर्थिक नुकसान होतं. त्यामुळं पशुपालकांनी लसीकरणला प्राधान्य द्यावं.

राज्यात गेल्या दोन दोन वर्षांपासून लम्पी रोगाचा मोठा फटका पशुपालकांना बसला होता. सध्या राज्यात लम्पी प्रतिबंधात्मक लसीकरण सुरू असून ५८.६३ लाख जनावरांना लसीकरण करण्यात आलं आहे. लम्पी रोग टाळण्यासाठी गोठ्यांची आणि जनावरांची काळजी घेणे गरजेचं आहे. गाय आणि म्हशीमध्ये लाळ खुरकुत आजार आढळतो. सध्या त्याचं लसीकरण सुरू आहे. राज्यातील ९३.२२ जनावरांना लसीकरण पूर्ण करण्यात आलं आहे.

जून महिन्यात बीड आणि पुणे जिल्ह्यात घटसर्प, शेळ्यां-मेंढयांच्या देवी रोगाचा इशारा देण्यात आला आहे. तर जुलै महिन्यात अहमनगर, अकोला, अमरावती, नाशिक जिल्ह्यात घटसर्प, तसेच अहमदनगर जिल्ह्यात फऱ्या, अहमदनगर आणि पुणे जिल्ह्यात पीपीआर रोगाबाबत सतर्कतेचा इशारा देण्यात आला आहे. तर ऑगस्ट महिन्यात अहमदनगर जिल्ह्याला लाळ खुरकुत, जळगाव घटसर्प, लातूरमध्ये फऱ्या तर अहमदनगर, धाराशीव, सांगली आणि वर्धा जिल्ह्यात पीपीआर रोगाचा सतर्कतेचा इशारा देण्यात आला आहे.

पशुसंवर्धन विभागाकडून या रोगांवर प्रतिबंधात्मक लसीकरण सुरू करण्यात आलेलं आहे. तशा सूचना क्षेत्रीय अधिकाऱ्यांना देण्यात आल्या आहेत. लसीकरण तत्काळ करून घेऊन आर्थिक नुकसान टाळावं, असं आवाहन पशुसंवर्धन आयुक्त कौस्तुभ दिवेगावकर यांनी केलं आहे. लसीकरणबाबतची अधिकच्या माहितीसाठी पशुपालकांना पशुसंवर्धन विभागाच्या १९६२ या टोल फ्री क्रमांकावर संपर्क साधता येणार आहे.