Lumpy Skin Disease : सातारा जिल्ह्यात ‘लम्पी’मुळे दोन जनावरांचा मृत्यू

Satara News : सातारा जिल्ह्यात पुन्हा एकदा लम्पी आजाराने डोके वर काढल्याने शेतकऱ्यांवर संकट ओढवले आहे. जिल्ह्यात या आजाराने दोन जनावरांचा मृत्यू झाला असून, २५० हून अधिक जनावरे बाधित झाली आहेत. या पार्श्वभूमीवर जिल्हा परिषदेच्या पशुसंवर्धन विभागाच्या वतीने प्रादुर्भाव रोखण्यासाठी उपाययोजना केल्या जात आहेत.

गेल्या वर्षी जिल्ह्यात लम्पीचा प्रादुर्भाव मोठ्या प्रमाणात वाढला होता. जिल्हा पशुसंवर्धन विभाग लम्पीचा प्रादुर्भाव रोखण्यात यशस्वी झाले तरी शेतकऱ्याचे मोठे नुकसान झाले होते. त्या पार्श्वभूमीवर राज्य सरकारने नुकसानग्रस्तांना आर्थिक मदतही दिली होती. जिल्ह्यात लसीकरणाची मोहीम प्रभावीपणे राबविण्यात आली होती.

मात्र, गेल्या चार दिवसांपासून लम्पीचा प्रादुर्भाव पुन्हा वाढू लागला आहे. गेल्या दोन दिवसांपूर्वी जावळी व वाई तालुक्यांत प्रत्येकी एका जनावराचा लम्पीने मृत्यू झाला असून, कोरेगाव, फलटण, खंडाळा, वाई, जावळी या पाच तालुक्यांत लम्पी आजाराने बाधित २५० जनावरे आढळून आली आहेत.

लम्पीचा प्रादुर्भाव वाढू लागल्याने पशुसंवर्धन विभागाकडून युद्धपातळीवर जनावरांचे लसीकरण करण्यात येत असून, २ लाख ७८ हजार ८१ जनावरांचे लसीकरण करण्यात आले आहे. बाधित जनावरांना ताप येणे, चारा खाण्याचे प्रमाण कमी होणे, अंगावर गाठी येणे अशी लक्षणे दिसून आली आहेत.