Fake Fertilizer : धाराशिव जिल्ह्यात अवैध खत साठा जप्त; दोघांवर गुन्हा दाखल

Fertilizer News : राज्यात कृषी विभागाच्या भरारी पथकाने छापा मारून अवैध खत साठा जप्त करण्यास सुरुवात केली आहे. धाराशिव जिल्ह्यातील पिंपळगाव लिंगी (ता.वाशी) येथील पोल्ट्री शेडमध्ये कृषी विभागाच्या भरारी पथकाने छापा मारला. या छाप्यात २० टन खतांचा अवैध साठा जप्त केला आहे.

जप्त केलेल्या अवैध खत साठ्याची किंमत ४ लाख ६१ हजार रुपये इतकी आहे. या प्रकरणात वाशी पोलिसांनी विकास होळे आणि दत्ता लिंबराज तावरे यांच्यावर गुन्हा दाखल केला आहे.

प्राथमिक चौकशीत तावरे यांनी खामकरवाडी येथील त्यांचे नातेवाईक विकास होळे यांच्या आणल्याचं सांगितलं आहे. यासंदर्भात कृषी अधिकाऱ्यांनी विकास होळे यांची चौकशी केली. होळे यांनी उत्तरात आपण दवाखान्यात असून उद्या पावती आणून देतो असं सांगितलं आहे. परंतु दोघांच्या चौकशीमध्ये समाधानकारक स्पष्टीकरण न दिल्यामुळे गुन्हा नोंद करण्यात आल्याचं कृषी अधिकाऱ्यांनी सांगितलं.

खरीप हंगाम तोंडावर आला आहे. त्यामुळे शेतकऱ्यांची निविष्ठा खरेदीची लगबग सुरू झाली आहे. परंतु बनावट आणि बोगस कृषी निविष्ठामुळे शेतकऱ्यांची फसवणूक होते. त्यामुळे राज्यात कृषी विभागाच्या भरारी पथकाकडून छापा मारून कारवाई सुरू आहे.

माहिती कशी मिळाली?

धाराशिवचे कृषी अधीक्षक कृषी अधिकारी रवींद्र माने यांना अवैध खत साठ्याची माहिती मिळाली. या माहितीनंतर कृषी भरारी पथकाने कारवाईचे आदेश दिले. शेतकरी दत्तात्रय लिंबराज तावरे यांच्या शेतातील पोल्ट्री शेडमध्ये छापा टाकला.

या कारवाईमध्ये ४५६ रासायनिक खतांची पोते भरारी पथकाला मिळाली. खत कोणत्याही परवान्याशिवाय साठवलं असल्याचं तपासणीत समोर आलं. कृषी विभागाने तीन खतांचे नमुने प्रयोगशाळेत तपासणीसाठी पाठवली आहेत. तपासणीनंतर संबंधित खताचा अहवाल प्राप्त होईल. त्यानंतर खताचा दर्जा तपासून पुढील कारवाई करण्यात येईल, असंही कृषी विभागाने सांगितलं आहे.