Dhule Fake Cotton Seeds: धुळ्यात २१ लाखांचे अवैध कापूस बियाणे जप्त

Dhule News: कृषी यंत्रणांनी एका मोहिमेत धुळे शहर आणि तालुका परिसरातून सुमारे २१ लाख रुपयांचे बनावट कापूस बियाणे जप्त केले आहे. संबंधितांवर कारवाईदेखील करण्यात आली आहे. विशेष पथकांनी एक चारचाकी आणि दोन ट्रॅव्हल्समधून अवैध कापूस बियाण्यांचा साठा पकडला.

धुळ्यातील शिरूर चौफुली परिसरात वाशिमहून येत असलेल्या एका चारचाकी वाहनामधून बियाणे जप्त करण्यात आले. तर, कमलबाई चौक परिसरात गुजरातहून येत असलेल्या दोन ट्रॅव्हल्स बसमधून कापूस बियाणे साठा हस्तगत करण्यात आला.

एका ट्रॅव्हल्स बसमधून कापूस बियाण्यांची ५० पाकिटे सापडली, तर अन्य एका ट्रॅव्हल्स बसमध्ये तब्बल १२०० अनधिकृत कापूस बियाणे पाकिटे आढळून आली. गुण नियंत्रण अधिकारी अरुण तायडे व सहकाऱ्यांनी ही कारवाई केली.

एका कंपनीचे अवैध देशी कापूस बियाणेदेखील सापडले आहे. जप्त केलेल्या कापूस बियाण्यांची किंमत अंदाजे २० ते २१ लाख रुपये असून, कृषी विभागाने याप्रकरणी दोषींवर कारवाई केली आहे. कृषी अधिकाऱ्यांनी वेश बदलून ही कारवाई केली. अधिकृत विक्रेत्यांकडूनच बियाणे व खते खरेदी करावीत, असे आवाहन कृषी विभागाने केले.