Mosambi Pest Control : नवीन किडीविषयी संशोधन करून त्यावर उपाययोजना करणार

Chh. Sambhajinagar News : मोसंबी आंबा फळपीक उत्पादक शेतकऱ्यांना नैसर्गिक हवामान बदलामुळे फळ पिकांवर होणारे बदल, कीड व्यवस्थापन उपाययोजना बाबत भारतीय कृषी अनुसंधान परिषद नवी दिल्लीच्या राष्ट्रीय एकात्मिक कीड व्यवस्थापन संशोधन संस्थेतर्फे नवीन किडीचे संशोधन केले जाईल, अशी माहिती वरिष्ठ शास्त्रज्ञ डॉ. प्रभू नारायण मीना यांनी दिली.

पैठण तालुक्यातील धनगाव येथील कृषी वसंत फार्म, बोरगाव, वाहेगाव, पाचलगाव आदी गावातील मोसंबी आंबा फळ बागेची गुरुवार (ता. २४) व शुक्रवार (ता. २५) रोजी वसंतराव नाईक मराठवाडा कृषी विद्यापीठ, परभणी, कृषी विज्ञान केंद्र, छत्रपती संभाजीनगर, भारतीय कृषी अनुसंधान परिषद राष्ट्रीय एकात्मिक कीड व्यवस्थापन संशोधन संस्था, नवी दिल्ली यांच्या संयुक्त कृषी शास्त्रज्ञ पथकाने पाहणी केली.

हवामान बदल, कीड व्यवस्थापन, मोसंबी व आंबा या फळपिकाबद्दल येणाऱ्या भविष्यातील कीड समस्या उपाययोजना व शेतकऱ्यांसाठी विविध सोयी सुविधा उपलब्ध करून देण्यासाठी भारतीय कृषी अनुसंधान परिषद, नवी दिल्लीचे वरिष्ठ शास्त्रज्ञ डॉ. प्रभू नारायण मीना, एकात्मिक कीड व्यवस्थापन राष्ट्रीय संशोधन केंद्र, राजपूरचे शास्त्रज्ञ डॉ. देवरमाने राघवेंद्र यांच्या टिमने प्रत्यक्ष बागेची पाहणी करत माती, किडी, पाने, फळ यांचे नमुने संशोधनासाठी घेतले.

तसेच येणाऱ्या काळात फळगळ, कीड-रोग आदी अडचणी वर मात करण्यासाठी शेतकऱ्यांना संशोधनाद्वारे वेळोवेळी मदत मार्गदर्शन केले जाईल स्पष्ट केले. संशोधनाद्वारे वेळोवेळी मदत मार्गदर्शन केले जाईल, असे आश्वासन टिमने देत उपस्थित फळ उत्पादकाला विविध कीड, रोगांवरील प्रतिबंधात्मक उपाययोजना बाबत सविस्तरपणे मार्गदर्शन केले.

या वेळी कृषी विज्ञान केंद्राचे मुख्य संयोजक डॉ. दीप्ती पाटगावकर, शास्त्रज्ञ डॉ. संजूला भवर, डॉ. बस्वराज पिसुरे, तालुका कृषी अधिकारी विकास पाटील, सहायक कृषी अधिकारी चंद्रकांत कुसळकर, यशवंत चौधरी, कृषिरत्न वसंतराव कातबने, युवा शेतकरी महाराष्ट्र शासन पुरस्कार विजेते यज्ञेश कातबने यांच्यासह कृषीचे विद्यार्थी फळ उत्पादक शेतकरी उपस्थित होते.