Crop Insurance Issue : पीकविम्याच्या मुद्यावर कृषिमंत्र्यांच्या उपस्थितीत कंपनीची बैठक लावा

Buldhana News : बुलडाणा जिल्ह्यातील शेतकऱ्यांचे अतिवृष्टी आणि पुराच्या पाण्यामुळे मोठ्या प्रमाणात नुकसान झालेले असताना पीकविमा कंपनी शेतकऱ्यांचे दावे फेटाळत आहे. यासंदर्भात तातडीची बैठक कृषिमंत्र्यांच्या उपस्थितीत लावावी अशी सूचना केंद्रीय आयुष आरोग्य व कुटुंब कल्याण राज्यमंत्री प्रतापराव जाधव यांनी जिल्ह्याचे पालकमंत्री दिलीप वळसे पाटील यांना केली.

मागील महिनाभरामध्ये जिल्ह्यातील अनेक भागांमध्ये अतिवृष्टी झाली. या अतिवृष्टीमुळे शेतजमिनी खरडून जाऊन पिकेही वाहून गेली. तर अनेक शेतात पाणी तुंबल्यामुळे पिकांचे मोठ्या प्रमाणात नुकसान झाले. काही ठिकाणी पुरामुळे शेतात पाणी घुसले. त्यामुळे तेथील शेतकऱ्यांच्या पिकाचेही मोठ्या प्रमाणात नुकसान झाले आहे.

पीकविमा कंपनीच्या वतीने सर्व्हे करण्यात आलेला नाही. अनेक शेतकऱ्यांनी ऑनलाइन आणि ऑफलाइन पद्धतीने नुकसानीच्या तक्रारी विमा कंपनीकडे केल्या. कंपनीने त्याची दखल घेतली नाही व सर्व्हे झालेला नाही. नुकसानग्रस्त शेतकऱ्यांचे दावे विमा कंपनीने फेटाळले आहेत. वास्तविक पाहता कृषी विभागाचे कर्मचारी आणि विमा कंपनीच्या प्रतिनिधींनी संयुक्तरीत्या झालेल्या नुकसानीचा सर्व्हेक्षण करणे अपेक्षित होते,

परंतु जिल्ह्यात असा कुठेही सर्व्हे झालेला नसल्याची बाब प्रथमदर्शनी निदर्शनास येत आहे. यासंदर्भात जिल्हा नियोजन समितीच्या बैठकीत सर्वच आमदारांनी खंतही व्यक्त केली. शेतकऱ्यांच्या कोणत्याही तक्रारीची दखल पीकविमा कंपनीने घेतलेली नसल्याने शेतकऱ्यांचे मोठ्या प्रमाणात नुकसान होत आहे.

नुकसानग्रस्त शेतकऱ्यांना पीकविम्याची मोबदला मिळण्याच्या दृष्टिकोनातून कृषिमंत्र्यांच्या उपस्थितीमध्ये जिल्हाधिकारी, पीकविमा कंपनीचे अधिकारी, कृषी अधिकारी आणि जिल्ह्यातील लोकप्रतिनिधींची संयुक्त बैठक लावावी अशा सूचना दिलीप वळसे पाटील यांना जाधव यांनी केली.