Watershed Development : जलसंधारणासाठी एकत्र या! हिंगोली जिल्ह्यात पाणलोट जनजागृती

Hingoli News : पंतप्रधान कृषी सिंचन योजना-पाणलोट विकास घटक २.० अंतर्गत पाणलोटविषयक कामाचे महत्त्व विशद करून या कामी लोकसहभाग वाढावा यासाठी जनजागृती करण्यासाठी हिंगोली जिल्ह्यात रविवार (ता. ९)पासून पाणलोट (वॉटरशेड) यात्रेच्या माध्यमातून कळमनुरी व सेनगाव तालुक्यातील ६ गावांमध्ये जनजागृती करण्यात येणार आहे. शेतकरी, ग्रामस्थांना पाणलोटविषयक शपथ देण्यात येणार आहे.

मृद्‍ व जलसंधारण विभागाच्या अंतर्गत जिल्ह्यातील कळमनुरी तालुक्यात दोन व सेनगाव तालुक्यात एक क्लस्टरमध्ये पाणलोट कामे सुरू आहेत. या कामाविषयी जनजागृती करून कामाची माहिती ग्रामीण भागातील जनतेला व्हावी यासाठी केंद्र शासनाने पाणलोट (वॉटरशेड) यात्रा सुरू केलेली आहे. एका दिवशी दोन गावात विविध कार्यक्रम घेतले जात आहेत.

या रथयात्रेची सुरुवात बोथी (ता. कळमनुरी) येथून रविवारी (ता. ९) सकाळी ९ वाजता होणार आहे. दुपारी ३ वाजता ही यात्रा कुंभारवाडी या गावात दाखल होईल. सोमवारी (ता. १०) ही यात्रा डोंगरगावपूल व कामठा (ता. कळमनुरी) येथे, तर मंगळवारी (ता. ११)बोरखडी व डोंगरगाव (ता. सेनगाव) गावामध्ये ही यात्रा जाणार आहे.

ग्रामस्थांना पाणलोटविषयी शपथ दिली जाणार आहे. प्रत्येक गावात प्रभात फेरी, महिला बचत गट बैठका आदी कार्यक्रम घेण्यात येणार आहेत. जिल्हा परिषद प्राथमिक शाळेत विविध स्पर्धा आयोजित केल्या आहेत. या स्पर्धेतील यशस्वी विद्यार्थ्यांना मान्यवरांच्या हस्ते सन्मानचिन्ह प्रमाणपत्र देऊन गौरविण्यात येणार आहे.

जलयोद्धा व धारिणीताई यांनाही सन्मान चिन्ह दिले जाणार आहे. या यात्रेत शेतकरी, ग्रामस्थांनी सहभागी होण्याचे आवाहन जिल्हाधिकारी अभिनव गोयल, जिल्हा जलसंधारण अधिकारी प्रफुल्ल खिराडे, तालुका कृषी अधिकारी महादेव कुंभार (ता. कळमनुरी), संदीप वळकुंडे (सेनगाव) यांनी केले आहे.