Indapur News: ‘‘इंदापूर तालुक्यामध्ये अतिवृष्टीमुळे घरामध्ये पाणी शिरून नुकसान झालेल्या २ हजार ८९४ कुटुंबांना सरकारच्या वतीने प्रत्येकी १० हजार रुपयांचे सानुग्रह अनुदान मंजूर झाले,’’ अशी माहिती इंदापूरचे तहसीलदार जीवन बनसोडे यांनी दिली.
इंदापूर तालुक्यामध्ये २४ ते २६ मे दरम्यान मुसळधार पाऊस झाला होता. मुसळधार पावसामुळे तालुक्यातील नदी, नाले, ओढ्यांना पूर आला. तालुक्यातील ५१ गावांमध्ये जवळपास २ हजार ९०० घरांमध्ये पाणी शिरले होते. अनेक ठिकाणी कालवा, तलावावरील बांध फुटून जमीन व शेती पिकांचे मोठ्या प्रमाणावर नुकसान झाले होते.
उपमुख्यमंत्री अजित पवार व क्रीडा मंत्री दत्तात्रेय भरणे मंत्री यांनी तातडीने पाहणी दौरा करून सर्व नुकसानीबाबत तातडीने पंचनामे करण्याबाबत आदेश दिले होते. प्रशासनाने तातडीने पंचनामे करण्यास सुरुवात केली. तसेच घरामध्ये पाणी गेलेल्या कुटुंबांना तातडीने १० किलो गहू व १० किलो तांदळाचे वाटप सुरू केले.
तसेच ज्या घरात पावसामुळे पाणी शिरून नुकसान झालेले आहे, अशा कुटुंबांसाठी प्रतिकुटुंब १० हजार रुपये मंजूर झाले आहेत. दोन दिवसांमध्ये संबंधित नुकसानग्रस्त नागरिकांच्या खात्यावर रक्कम जमा होईल. तसेच अतिवृष्टीमुळे मृत झालेल्या पशुधनांचे पंचनामे करण्यात आलेले असून त्याबाबतही सानुग्रह अनुदान वितरणाची कार्यवाही सुरू करण्यात आली आहे.
तालुक्यामध्ये ८१ घरांची पडझड झालेली असून त्याबाबत अनुदान मागणी करण्याची कार्यवाही सुरू आहे. तालुक्यामध्ये अतिवृष्टीमुळे जवळपास २ हजार हेक्टरवरील पिकांचे नुकसान झालेले असून सदर नुकसानीबाबत पंचनामे सुरू असून लवकरच मदत जमा होणार आहे.
कोणतीही बाधित व्यक्ती अनुदानापासून वंचित राहणार नाही याची दक्षता घेण्यात येत असून इंदापूर तालुक्यातील सर्व संबंधित शेतकरी बांधव व नागरिक यांनी सुरू असलेल्या पंचनाम्यांच्या अनुषंगाने ग्राम महसूल अधिकारी, ग्रामसेवक, कृषी सहाय्यक यांना सहकार्य करावे असे आवाहन बारामतीचे उपविभागीय अधिकारी वैभव नावडकर व तहसीलदार जीवन बनसोडे यांच्या वतीने करण्यात आलेले आहे.
‘जास्तीजास्त मदत मिळवून देण्याचा प्रयत्न’
‘इंदापूर तालुक्यातील जनतेच्या पाठीमागे मी खंबीरपणे उभा आहे. तालुक्यातील अतिवृष्टीमुळे नुकसान झालेल्या शेतकऱ्यांना तसेच घरामध्ये पाणी गेलेल्या नागरिकांना, घरे पडून नुकसान झालेल्या कुटुंबांना जास्तीजास्त मदत मिळवून देण्याचा प्रयत्न सुरू आहे,’ असल्याचे क्रीडा व युवक कल्याण मंत्री दत्तात्रेय भरणे यांनी सांगितले.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.