Sangli Rainfall : सांगली जिल्ह्यातील विविध भागांत मुसळधार पाऊस

Sangli News : जिल्ह्यात गेल्या आठवड्यापासून पावसाने उघडीप दिली होती. मात्र, पश्चिम भागात गुरुवार (ता. १२) सायंकाळी मुसळधार पावसाने हजेरी लावली. या पावसाने पुन्हा शेतात पाणी साचून राहिले आहे. त्यामुळे खरीप हंगामातील पेरण्या लांबणीवर पडणार असल्याची भीती शेतकऱ्यांमध्ये निर्माण झाली आहे.

जिल्ह्यात गेल्या आठवडाभर पावसाने उसंत दिली होती. मात्र, गेल्या दोन-तीन दिवसांपासून ढगाळ वातावरण निर्माण झाले आहे. दिवसभर ऊन आणि सायंकाळी मध्यम पाऊस पडतो आहे. इस्लामपूर, शिराळा, शहरासह परिसरात ढगफुटी सदृश मुसळधार पावसाने झोडपून काढले. साधारण दोन-तीन तास सतत पावसाची संततधार सुरू होती.

अनेक ठिकाणी नाले तुंबून रस्त्यावर पाणी वहात होते. शिराळा येथील बाजार समिती आवारात व्यापारी गाळ्या समोर मोठ्या प्रमाणात पाणी साचले काही गाळ्यांमध्ये पाणी शिरले. शिराळा तालुक्यात माळरानावर शेतकऱ्यांनी मशागतीसह पेरणीस सुरुवात केली.तर काही ठिकाणी दोन्ही कामे ठप्प झाली आहेत. सध्या ५० टक्के पेरण्या झाल्या असून आता ५० टक्के बाकी आहेत.मुसळधार पाऊस पडल्याने पेरण्या आणखी लांबणीवर पडणार आहेत.

तासगाव तालुक्यातील नरसिंगपूर, लिंबगाव, कापूरगाव, विजयनगर, घोटी परिसरात येथे गुरुवारी सायंकाळी ६ ते ९ या वेळेत ढगफुटी सदृश्य तुफान पाऊस झाला. यावेळी ओढे-नाले आणि शेतातील बांध फुटून पडणारे पाणी मोठ्या प्रमाणावर वाहू लागल्याने पेडचा कापूर ओढा पात्राबाहेर वाहू लागला असून गावात पाणी शिरले आहे.

वारणा धरणपाणलोट क्षेत्रात पावसाचा जोर कमी आहे. गेल्या चोवीस तासांत २६ मिलीमीटर इतक्या पावसाची नोंद झाली आहे. दुष्काळी पट्ट्यातील आटपाडी, खानापूर, कवठेमहांकाळ आणि जत तालुक्यांत दिवसभर ढगाळ वातावरण आहे. याभागात पेरणी सुरू असून हा पाऊस पेरणीसाठी उपयुक्त असल्याने शेतकऱ्यांना काहीसा दिलासा मिळाला आहे.