Pune Rain : पुणे जिल्ह्यात अनेक ठिकाणी जोरदार पावसाची हजेरी

Pune News : परतीच्या पावसासाठी पोषक वातावरण तयार झाल्याने पुणे जिल्ह्यात अनेक ठिकाणी रविवारी (ता. २२) रात्रीच्या सुमारास जोरदार पाऊस झाला. सोमवारी (ता. २३) सकाळी आठपर्यंत भोरमधील वेळू येथे ४४ मिलिमीटर पाऊस पडल्याची नोंद झाली. पावसामुळे हवेत काहीसा गारवा तयार झाला असला तरी अनेक ठिकाणी काढणी केलेल्या बाजरी, सोयाबीन, मूग, उडीद अशा पिकांच्या नुकसानीस हा पाऊस कारणीभूत ठरणार आहे.

मागील काही दिवस ऊन पडत असल्याने शेतीकामांनी चांगलाच वेग घेतला होता. त्यानंतर मागील दोन दिवसांपासून ढगाळ वातावरण तयार होत आहे. रविवारी सकाळपासून वातावरणात बदल होत होता. सायंकाळी ढग दाटून आले आणि रात्री अनेक ठिकाणी जोरदार व हलका पाऊस पडला.

हवेलीतील उरूळी कांचन येथे ३५ मिमी पाऊस झाला. तर हडपसर येथे ३० मिमी, तर खेड शिवापूर येथे २९ मिमी, पुणे वेधशाळा, केशवनगर येथे १४ मिमी पाऊस पडला. तर खडकवासला, थेऊर, उरुळीकांचन, खेड, भोसरी, कळस, हडपसर, वाघोली येथे हलका पाऊस झाला. मुळशीतील थेरगाव, माले, मुठे येथे शिडकावा झाला.

भोरमधील भोलावडे, नसरापूर, किकवी, वेळू, आंबवडे, संगमनेर, निगुडघर येथे हलका, वेल्ह्यातील पानशेत, विंझर, आंबवणे येथे तुरळक सरी पडल्या.जुन्नरमधील नारायणगाव, निमगाव सावा, आपटाळे, ओतूर, खेडमधील राजगुरुनगर, आळंदी, पिंपळगाव, कन्हेरसर, कडुस, आंबेगावमधील आंबेगाव, पारगाव, शिरूरमधील टाकळी, वडगाव, न्हावरा, मलठण, तळेगाव, रांजणगाव, कोरेगाव, पाबळ येथे हलका पाऊस झाला.

बारामतीतील सुपा येथे ३१ मिमी पाऊस झाला असून माळेगाव, पणदरे, वडगाव, लोणी, सुपा, मोरगाव, उंडवडी, इंदापुरातील भिगवण, इंदापूर, लोणी, बावडा, काटी, निमगाव, अंथुर्णी, सणसर, दौंडमधील देऊळगाव, पाटस, यवत, कडेगाव, राहू, वरवंड, रावणगाव, दौंड, पुरंदरमधील सासवड, भिवंडी, कुंभारवळण, जेजुरी, परिंचे, राजेवाडी, वाल्हा येथे हलक्या सरी बरसल्या. त्यामुळे शेतकऱ्यांची धावपळ झाली. काही ठिकाणी पिकांचे नुकसान झाले.