Palghar Heavy Rain: पाणलोट क्षेत्रात पावसाचा जोर

Palghar News: चार दिवसांपासून वज्रेश्वरी परिसरासह तानसा नदी पाणलोट क्षेत्रात पावसाचा जोर टिकून आहे. या पाणलोट क्षेत्रात सोमवारी दुपारपासून जोरदार पावसाने हजेरी लावली आहे. यामुळे वज्रेश्वरी, अकलोली, गणेशपुरी आणि उसगाव या गावांमध्ये वातावरण धुक्याच्या चादरीत गुंडाळले असून, नदी-नाले भरून वाहू लागले आहेत.

भिवंडी तालुक्यातील पाणलोट क्षेत्रामध्ये शनिवारी सायंकाळपासून पावसाने जोर पकडला आहे. त्यानंतर हवामानात गारवा निर्माण झाला आहे. सततच्या पावसामुळे डोंगरदऱ्यांतील लहान नाले, धबधबे जिवंत झाले आहेत.

तानसा नदी दुथडी भरून वाहत आहे. यामुळे परिसरात पावसाळी पर्यटनाला रंग चढू लागला आहे. अकलोली कुंड आणि उसगाव धरण परिसरात पोलिसांचा कडक बंदोबस्त ठेवण्यात आला आहे.

सहाय्यक पोलिस निरीक्षक कमलेश बच्छाव यांच्या नेतृत्वाखाली मद्यपान करणाऱ्यांवर करडी नजर ठेवली आहे. काही पर्यटकांनी येथे येण्याचा प्रयत्न केला; मात्र बंदोबस्तामुळे त्यांना परतावे लागले. दुसरीकडे, पावसामुळे शेतीकामांना गती मिळाली आहे.