Pune Water Stock : पुणे जिल्ह्यातील धरणांत एकूण ४५.८८ टक्के पाणीसाठा

Pune News : यंदा जिल्ह्यातील धरणक्षेत्रात मॉन्सूनपूर्व पावसाचा जोर कमीअधिक होता. परंतु २६ मेमध्ये दरम्यान जोरदार पाऊस झाल्याने ओढे, नाले ओसंडून वाहू लागले होते. त्यामुळे यंदा पहिल्यांदाच जूनमध्ये जिल्ह्यातील २६ धरणसाखळीत ४५.८८ टीएमसी म्हणजेच २३.१८ टक्के पाणीसाठा झाला आहे.

मेच्या शेवटच्या आठवड्यात धरणक्षेत्रात पावसाचा बऱ्यापैकी जोर होता. यामुळे जिल्ह्यातील २६ धरणांत नव्याने मोठ्या प्रमाणात पाण्याची आवक झाली आहे. ३१ मेपर्यंत धरणांत उपयुक्त जवळपास २० टीएमसी एवढ्या पाण्याचा येवा दाखल झाला आहे, अशी माहिती जलसंपदा विभागाच्या सूत्रांनी दिली.

गेल्या आठवड्यात पावसाने उघडीप दिली होती. या काळात अनेक ठिकाणी कडक ऊन पडले. त्यामुळे धरणातील आवक घटली आहे. त्यानंतर पुन्हा मागील दोन ते चार दिवसांपासून अधूनमधून सरी बरसत आहेत. आतापर्यंत उजनी, मुळशी, टेमघर अशा काही महत्त्वाच्या धरणक्षेत्रात जोरदार पाऊस पडल्याची नोंद जलसंपदा विभागाकडे झाली आहे. त्यामुळे निरा, मुठा खोऱ्यातील धरणातील पाणीसाठ्यात काही प्रमाणात वाढ झाली आहे.

आता पावसाचे प्रमाण कमी झाले असले तरी रविवारी (ता. ८) सकाळी आठपर्यंत १.१० टीएमसी एवढ्या पाण्याची आवक झाली आहे. एक जूनपासून ते आतापर्यंत धरणात नव्याने ८.८० टीएमसी एवढ्या मोठ्या प्रमाणात पाण्याचा येवा दाखल झाल्याने पिण्याच्या पाण्याची काही प्रमाणात समस्या सुटली आहे. सध्या धरणांत एकूण उपयुक्त पाणीसाठा मोठ्या प्रमाणात झाला आहे.

गेल्या वर्षी याच काळात धरणांत अवघा १५.४४ टीएमसी म्हणजेच ७ टक्के पाणीसाठा होता. गेल्या वर्षीच्या तुलनेत चालू वर्षी मोठ्या प्रमाणात पाणीसाठा उपलब्ध झाला आहे. चालू वर्षी साधारणपणे २६ मेच्या दरम्यान मॉन्सून दाखल झाल्यानंतर दक्षिण महाराष्ट्रासह पुणे जिल्ह्यात अनेक ठिकाणी पावसाने दमदार हजेरी लावली. या पावसामुळे जिल्ह्यातील जवळपास सर्वच धरणक्षेत्रात पावसाचा जोर कमीअधिक होता.

काही धरणक्षेत्रात पावसाचा जोर अधिक होता. यात उजनी, मुठा खोरे, निरा, कुकडी आणि भिमा खोऱ्यातील धरणक्षेत्रात पावसाचा जोर अधिक राहिला. त्यामुळे अनेक ठिकाणी शेतातून पाणी वाहिल्याने ओढेही खळाळून वाहू लागले आहेत. धरणांत सुरुवातीला कमी आवक होती. परंतु पावसाचा जोर वाढल्यानंतर धरणांत नव्याने आवक सुरू झाली होती.

‘उजनी’त पाण्याची सर्वाधिक आवक

उजनी, निरा आणि भीमा नद्यांच्या कार्यक्षेत्रात पावसाने चांगलाच धुमाकूळ घातला होता. यात उजनी धरणक्षेत्रात चांगलाच पाऊस पडल्याची नोंद झाली. उजनी धरणात सर्वाधिक पाण्याची आवक झाली आहे. आतापर्यंत उजनीत २२ ते २५ टीएमसी एवढ्या पाण्याची आवक झाली आहे. यामुळे उजनीतील पाणीसाठा उणेतून अधिकमध्ये येऊन तो आता १८.०३ टीएमसी झाला आहे.