Banana Production : खानदेशात केळी कंदांखाली क्षेत्र अधिक

Jalgaon News : खानदेशात मृग बहरातील केळीची लागवड गतीने सुरू आहे. कंदांसह रोपांना मोठी मागणी आहे. यातच अनेकांनी लागवड उरकली आहे. रोपांचा पुरवठादेखील करून घेतला आहे. सध्या कंदांचा पुरवठा अधिक व लागवडीची कार्यवाही बंद अशी स्थिती असल्याने कंदांचे दर घसरले असून, ग्रॅण्ड नैन वाणाच्या उतिसंवर्धित (टिश्यू) रोपांच्या केळी बागांमधील कंदांचे दर प्रतिकंद तीन रुपयांपर्यंत आहेत.

ग्रॅण्ड नैन वाणाच्या उतिसंवर्धित (टिश्यू) रोपांच्या केळी बागांमधील कंदांना खानदेशात कांदेबाग केळी लागवडीसाठी मोठी मागणी होती. ही मागणी मागील आठवड्यातही बऱ्यापैकी होती. परंतु या आठवड्यात कंदांचे दर घसरले आहेत. प्रतिकूल स्थिती, पाऊस, केळी लागवडीबाबत शेतकऱ्यांनी पुढे ढकललेले नियोजन व कंदांचा अधिकचा पुरवठा यामुळे दरात घसरण झाली आहे.

पंधरवड्यात ग्रॅण्ड नैन वाणाच्या उतिसंवर्धित रोपांच्या केळी बागांमधील कंदांचे दर प्रतिकंद चार ते पाच रुपये, असे होते. यात केळी कंद काढण्याची मजुरी व शेतकऱ्याने कंद वाहतुकीसाठी आणलेल्या वाहनात कंद भरून देण्याची कार्यवाहीदेखील करून देण्याची जबाबदारी कंद मालकाकडे होती. परंतु मागील चार ते पाच दिवसात ग्रॅण्ड नैन वाणाच्या उतिसंवर्धित रोपांच्या केळी बागांमधील कंदांचे दर घसरले आहेत.

अनेक कंद मालक किंवा पुरवठादार शेतकरी प्रतिकंद तीन रुपये दर घेवू लागले आहेत. तर काही शेतकरी अडीच रुपये प्रतिकंद असे दर घेण्याची तयारीदेखील दाखवीत आहेत. मृग बहर केळी लागवडीचा काळ हा मे ते जुलै या महिन्यात अनुकूल मानला जातो. जुलैत बागांची लागवड केली जाते. पुढे पाऊस आल्यास अडथळा येईल, हे लक्षात घेऊन केळीची लागवडीस गती दिली आहे.

कंद पुरवठादार एजंट सक्रिय

तूर्त केळी लागवड कमी करण्याचे किंवा पुढे करण्याचे नियोजन शेतकऱ्यांनी करताच कंद पुरवठादार, एजंट, कंद मालकांनी सोशल मीडियात आपल्या कंदांचे दर व इतर माहितीची जाहिरात प्रसारित करण्यास सुरुवात केली आहे. ग्रॅण्ड नैन वाणाच्या उतिसंवर्धित रोपांच्या केळी बागांमधील कंदांचे दर कमी दरात व वेळेत दिले जातील, आपली आगाऊ नोंदणी करून घ्या, असे संदेश सोशल मीडियात मागील दोन दिवसांपासून फिरू लागले आहेत.