Tur Procurement : पेरा नोंदणीअभावी शासकीय तूर खरेदी रखडली

Nanded News : हमीभावाने तूर खरेदीसाठी ता. २४ जानेवारीपासून ऑनलाइन पोर्टलवर नोंदणी सुरु झाली आहे. यासाठी पणन महासंघाच्या २१ खरेदी केंद्रांवर १३ फेब्रुवारीपासून तूर खरेदी सुरू झाली. परंतु नऊ केंद्रांवर केवळ ४१ शेतकऱ्यांनी नोंदणी केली.

तर एका केंद्रावर १९ क्विंटल तूर खरेदी झाली. ऑनलाइन पेरा नोंदणी नसल्यामुळे तूर खरेदी रखडली आहे. परिणामी, हजारो शेतकरी तूर विक्रीविना वंचित राहण्याची शक्यता आहे. शासनाने याबाबत मार्ग काढून शेतकऱ्यांची तूर खरेदी करावी, अशी मागणी होत आहे.

केंद्र शासनाच्या किमान आधारभूत किंमत खरेदी योजनेअंतर्गत नांदेड जिल्ह्यात एनसीसीएफच्या माध्यमातून महाराष्ट्र स्टेट को-ऑपरेटिव्ह फेडरेशनच्या वतीने (पणन महासंघ) २१ तर विदर्भ सहकारी पणन महासंघाच्या पाच अशा एकूण २७ खरेदी केंद्रांवर तूर खरेदी करण्यात येणार आहे. या ठिकाणी तूर खरेदीसाठी ता. २४ जानेवारीपासून तीस दिवसांपर्यंत ऑनलाइन पोर्टलवर नोंदणीसाठी मुदत होती.

या केंद्रावर तूर खरेदी ता. १३ फेब्रुवारीपासून सुरू झाली. परंतु अपेक्षित नोंदणी झाली नसल्याने राज्य शासनाने पुन्हा ३० दिवसाची मुदतवाढ दिली. दरम्यान, या काळात शेतकऱ्यांना तुरीचा ऑनलाइन पीकपेरा नोंदणी असलेला सातबारा उतारा, आधार कार्ड व बँक पासबुक घेऊन तालुक्यातील खरेदी केंद्रावर नोंदणी करावी, असे आवाहन करण्यात आले आहे.

परंतु शेतकऱ्यांच्या सातबारावर तुरीचा पेरा नोंद नसल्यामुळे पणनच्या ३१ पैकी नऊ खरेदी केंद्रावर ४१ शेतकऱ्यांनी नोंदणी केली. यातील गणेशपूर (ता. किनवट) येथील खरेदी केंद्रावर केवळ १९ क्विंटल तुरीची खरेदी झाली. अनेक शेतकऱ्यांकडे तुरीचा पेरा नोंदविलेला नाही.

यामुळे शेतकऱ्यांना तूर खासगी बाजारात देण्याची वेळ आली आहे. सध्या बाजारात तुरीचे दर हमी दरापेक्षा पाचशे ते सातशे रुपयांपर्यंत खाली आहेत. यामुळे शेतकऱ्यांना नाइलाजास्तव कमी दराने तूर बाजारात विकावी लागत आहे.

शासनाने तुरीचा पेरा नोंदणी संदर्भात मार्ग काढून हस्तलिखित पेरा घेण्यासंदर्भात निर्णय घ्यावा. किंवा सोयाबीनमध्ये आंतरपीक म्हणून घेत असलेल्या तुरीची पेरणी गृहीत धरून सोयाबीनच्या २५ टक्के पेरा तुरीचा समजून खरेदीसाठी आदेश काढावेत अशी मागणी शेतकऱ्यांतून होत आहे.