Nashik News : नाशिक : तृणधान्यांमधील पोषणमूल्यांमुळे त्यांचे आहारातील आरोग्यविषयक महत्त्व अनन्यसाधारण आहे. हे लक्षात घेऊन नागरिकांनी दैनंदिन आहारात तृणधान्यांचा समावेश वाढविणे आवश्यक आहे. तृणधान्याचे महत्त्व अधिक लोकाभिमुख होण्याच्या दृष्टिने तसेच जिल्हा व तालुकास्तरावर तृणधान्य उत्पादक शेतकऱ्यांना कायमस्वरूपी विक्री व्यवस्था उपलब्ध करून देण्याच्या दृष्टिने शासनस्तरावर प्रयत्न करण्यात येतील, असे प्रतिपादन कृषिमंत्री ॲड. माणिकराव कोकाटे यांनी केले.
कृषी पणन मंडळाच्या विभागीय कार्यालयाच्या वतीने नाशिक येथे उदाजी महाराज शैक्षणिक वारसा संग्रहालय, गंगापूर रोड येथे आयोजित ‘मिलेट महोत्सव-२०२५’ कार्यक्रमात मंत्री कोकाटे बोलत होते. या वेळी महाराष्ट्र राज्य कृषी पणन मंडळ पुणेचे सरव्यवस्थापक विनायक कोकरे, कृषी पणन मंडळ विभागीय कार्यालय नाशिकचे उपसरव्यवस्थापक एस. वाय. पुरी, कृषी महाविद्यालयाचे प्राचार्य डॉ. बी. डी. भाकरे, डॉ. शुभदा जगदाळे, प्राचार्य विलास देशमुख यांच्यासह प्राध्यापक व विद्यार्थी उपस्थित होते.
कोकाटे म्हणाले, की देशातील ५० टक्के नागरिक हे शेती व्यवसायाशी संबंधित असून शेतीमध्ये अनेक आमुलाग्र बदल होताना दिसत आहेत. शेतीतील नवनवीन प्रयोगांच्या माध्यमातून नवीन विकसित वाण, पीकपद्धती विकसित होत आहेत.
या शेती उत्पादितांना त्यांच्या गाव, तालुका व जिल्ह्याच्या ठिकाणी विक्री व्यवस्था व बाजारपेठ उपलब्ध होण्यासाठी पणन मंत्री यांच्यासमवेत चर्चा करून शासनस्तरावर प्रयत्न करणार. तसेच मिलेट महोत्सवासमवेत कृषी प्रदर्शने जिल्ह्याबरोबरच तालुका व गाव पातळीवर व्हावीत, असेही त्यांनी सांगितले.
उत्पादकांकडून प्रदर्शन तसेच विक्री
तृणधान्यापासून तयार करण्यात आलेल्या विविध खाद्यपदार्थांचे ३० स्टॉल उभारण्यात आलेले आहेत. यात नाशिकसह, सोलापूर, जळगाव, सातारा, नांदेड, अहिल्यानगर, छत्रपती संभाजीनगर, धुळे, पुणे जिल्ह्यांतील समूह सहभागी झाले आहेत. ग्राहकांना ज्वारी, बाजरी, नाचणी, भगर ही तृणधान्ये व यापासून तयार करण्यात येणारे पदार्थ तसेच ज्वारीचा रवा, बाजरीच्या लाह्या, रागीची बिस्किटे, ज्वारीचे इडली-मिक्स, बाकरवडी, शेवया, नूडल्स, आईस्क्रिम, खाकरे, शेव, चिवडा, रागीचा डोसा मिक्स आदी नावीन्यपूर्ण उत्पादने थेट उत्पादकांकडून प्रदर्शन तसेच विक्रीसाठी उपलब्ध करून देण्यात आली आहेत.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.