Gold Rate : सोने पुन्हा चकाकले

अॅग्रोवन वृत्तसेवा
Jalgaon News : जळगाव ः सोने दरात या आठवड्यात पुन्हा एकदा मोठी वाढ झाली आहे. दर विनाजीएसटी ७१ हजार ६५० रुपये प्रतितोळा, असे येथील सराफा बाजारात पोहोचले आहेत. चांदी दरही विनाजीएसटी ८३ हजार रुपये प्रतिकिलो, असे आहेत.

सोने दरात मागील सात ते आठ दिवसांत एक तोळ्यामागे १८०० रुपयांची घसरण झाली होती. तसेच चांदी दरातही एक किलोमागे तीन हजार रुपये घसरण झाली होती. २० एप्रिल रोजी सोने दर विनाजीएसटी ७६ हजार १४ रुपये प्रतितोळा, असा होता. तर चांदी दर विक्रमी स्थितीत म्हणजेच ८६ हजार ५२० रुपये प्रतिकिलो (विनाजीएसटी) असे होते.

गुढीपाडव्याला सोने दर प्रतितोळा ७४ हजार ३६६ रुपये असे होते. परंतु त्यात वाढ होत गेली. परंतु नंतर सोने व चांदी दरात नरमाईदेखील आली. सोने व चांदी दर ऐन लग्नसराईच्या काळात वधारले. यामुळे ग्राहकांना फटका बसला. परंतु त्यात नरमाई आल्याने ग्राहकांना दिलासाही मिळाला होता. आता अक्षय तृतीयेच्या पार्श्‍वभूमीवर सोने दरात एक तोळ्यामागे ४५० रुपयांची वाढ झाली आहे. तर चांदी दरात एक किलोमागे दोन हजारांची वाढ झाली आहे.

मोठ्या गुंतवणूकदारांकडून खरेदी
सोने खरेदीबाबत ग्रामीण भागातून कोणताही प्रतिसाद मिळत नसल्याची स्थिती आहे. परंतु चाकरमानी, मोठे गुंतवणूकदार सोने खरेदी करीत आहेत. लग्नसराईमुळेदेखील येथील सराफा बाजारात उलाढाल बरी आहे, अशी माहिती मिळाली.