Sugarcane FRP : सोलापुरात ७३ कोटी रुपयांची एफआरपी थकित

Solapur News : सोलापुर जिल्ह्यात नोव्हेंबरच्या पहिल्या पंधरवड्यापर्यंत गाळप झालेल्या उसापोटी जिल्ह्यातील ११ कारखान्यांकडे ७३.२ कोटी रुपये एफआरपी थकीत आहे. विविध शेतकरी संघटनासह वैयक्तिक शेतकरीही कारखान्यांकडे त्यासाठी पाठपुरावा करत आहेत. पण वायद्यावर वायदे कारखान्यांकडून सांगितले जाते आहेत.

सोलापूर जिल्ह्यात यंदाच्या हंगामातील पहिल्या पंधरवड्यात ३३ कारखान्यांनी १७ लाख ३७ हजार ९४३ टन उसाचे गाळप केले. कारखान्यांनी त्याचे ३८७.७६ कोटी रुपये शेतकऱ्यांना ऊसबिलाच्या स्वरूपात दिले आहेत.

२२ कारखान्यांनी बेसिक रिकव्हरीप्रमाणे १०० टक्के एफआरपी दिली आहे. भैरवनाथ शुगरच्या विहाळ, लवंगी व आलेगाव येथील युनिट्स, युटोपियन, धाराशिव (सांगोला) या कारखान्यांनी पहिल्या पंधरवड्यातील

एक रुपयाही शेतकऱ्यांना दिला नाही. तर लऊळच्या संत कुर्मदास कारखान्याने ३९.५८ टक्के, बीबीदारफळच्या लोकमंगल साखर कारखान्याने ५५.६० टक्के, बार्शीच्या इंद्रेश्वर शुगरने १४.८० टक्के, तर माढ्यातील बबनरावजी शिंदे कारखान्याने २७.४७ टक्के एफआरपी दिली आहे.

आता जादा ऊसदर कसा परवडतो?

पाणी टंचाईमुळे या वर्षी उसाच्या क्षेत्रात मोठी घट झाली आहे. त्यामुळे कारखान्यांना उसासाठी धावाधाव करावी लागत आहे. परिणामी, ऊस खेचण्यासाठी कारखान्यांमध्ये पहिला हप्ता देण्याची स्पर्धा सुरू आहे. काही कारखान्यांनी उसाचा पहिला हप्ता २८०० रुपये व त्यापेक्षा अधिक जाहीर केला आहे.

काही कारखाने पहिला हप्ता २६०० ते २७०० रुपये देत आहेत. शेजारच्या जिल्ह्यातील काही कारखाने तर २९०० रुपये पहिला हप्ता येऊन उसाची पळवापळवी करत आहेत. ऊसटंचाईमुळे कारखान्यांना या वर्षी उसाचा पहिला हप्ता जादा देणे परवडते आहे. मग गतवर्षी तो जादा का दिला नाही, असा सवाल उपस्थित जात आहे.

३० नोव्हेंबरअखेर कारखानानिहाय थकीत असलेली एफआरपी (कोटीत)

कारखाना थकीत एफआरपी

१) सिद्धेश्वर (कुमठे) -१.८३

२) संत कुर्मदास (लऊळ) -४.५७

३) लोकमंगल (बिबीदारफळ) ०.७१

४) लोकमंगल (भंडारकवठे) २.८३

५) इंद्रेश्वर शुगर (बार्शी) ५.१५

६) भैरवनाथ (विहाळ) ७.९५

७) भैरवनाथ (लवंगी) ९.३६

८) युटोपियन (मंगळवेढा) ९.५८

९) भैरवनाथ (आलेगाव) २.१५

१०) बबनरावजी शिंदे (माढा) २३.८२