Sangli News : कळंबी (ता. खानापूर) येथील पाझर तलावाखाली असणारे चारशे एकर क्षेत्र पाण्याच्या प्रतीक्षेत असून पाण्याअभावी बागायत पिके वाळू लागली आहेत. तलावात टेंभूचे पाणी सोडून पिकांचे होणारे नुकसान टाळावे, अशी मागणी शेतकऱ्यांतून होत आहे.
कळंबी गावापासून पूर्वेला तीन किलोमीटरवर पाझर तलाव आहे. सध्या हा तलाव कोरडा पडला आहे. तलाव परिसरात सुमारे चारशे एकर बागायत क्षेत्र आहे. उसासह अन्य भाजीपाला शेतकरी पिकवत आहेत. सध्या पिके वाळू लागली आहेत.
तलावात पाइपलाइनद्वारे टेंभूचे पाणी सोडले जात होते. आता ती पाइपालाइन पुढील शिवारात गेल्याने व तलावाच्या बाजूने घसरण असल्याने पाणी तलावात न जाता थेट पुढे जात आहे. कळंबी तलावात पाणी जाण्यासाठी पाइपालाइनला स्टॉपर व वेगळी दारे बसविणे गरजेचे असल्याचे शेतकरी सांगत आहेत.
त्यासाठी शेतकऱ्यांनी टेंभूच्या ओगलेवाडी (कऱ्हाड) व कडेपूर येथील कार्यालयात अधिकाऱ्यांची भेट घेऊन पाणी सोडण्याची मागणी केली. सध्या टेंभूचे आवर्तन बंद आहे, पाणी सोडण्याचे अधिकाऱ्यांनी आश्वासन दिले आहे. पाण्यासाठी शेतकऱ्यांचा पाठपुरावा सुरू आहे. मात्र कधी पाणी सोडणार, असा सवाल शेतकरी करत आहेत.
टेंभूची नेवरी वितरिका खानापुरातील ढवळेश्वरपर्यंत आली आहे. तेथून कळंबीपर्यंत वितरिकेचे काम झाल्यास ढवळेश्वरचा उत्तर भाग व कळंबीच्या दक्षिण भागातील पाचशे हेक्टरला फायदा होऊ शकतो.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.