Food Safety: अन्न व औषध प्रशासनाकडून ४५ प्रकरणे न्यायालयात दाखल

Chhatrapati Sambhajinagar: छत्रपती संभाजीनगर जिल्ह्यात गेल्या सहा महिन्यांत १९ प्रकरणांमध्ये १ लाख रुपये दंड ठोठावण्यात आला आहे. तर ४५ प्रकरणे न्यायालयात दाखल केले आहेत. सर्व्हेक्षण म्हणून ५५४ नमुने घेण्यात आले असल्याची माहिती समितीचे सदस्य सचिव तथा सहायक आयुक्त अन्न व औषध प्रशासन द. वि. पाटील यांनी दिली.

सुरक्षित अन्न व आरोग्यदायक आहार सल्लागार समितीची मंगळवारी (ता. ८) जिल्हास्तरीय सुकाणू समितीची बैठक पार पडली. या प्रसंगी सहायक आयुक्त श्री. पाटील, डॉ. सारिका लांडगे, डॉ. महेश लड्डा, महिला व बालविकास विभागाचे आर. आर. भिमनवार आदी समिती सदस्य या वेळी उपस्थित होते.

बैठकीत पुढे आलेल्या माहितीनुसार, जिल्ह्यात आतापर्यंत (जानेवारी ते जून २०२५) करण्यात आलेल्या कारवाईची माहिती देण्यात आली. त्यानुसार, दूध व दुग्धजन्य पदार्थांचे ४६ नमुने तपासणीसाठी घेण्यात आले. ११ नमुने असुरक्षित असल्याचे आढळून आले. पनीरचे १८ नमुने घेण्यात आले त्यात २ नमुने असुरक्षित होते. ईट राईट इंडिया चॅलेंज अंतर्गत शाळा, महाविद्यालये, शासकीय कार्यालये यांच्या कॅन्टीन सुविधांचे निर्जंतूकता गुणांकन करण्यात आले.

उन्हाळ्यात शीतपेये, उसाचा व फळांचा रस विक्रेते, खाद्य बर्फ विक्रेते, बाटलीबंद पाणी विक्रेते यांच्या तपासण्या करण्यात आले. १९ नमुने तपासण्यात आले त्यात १ नमुना असुरक्षित असल्याचे दिसून आले. आंब्यांचे नमुनेही घेण्यात आले. त्याचे अहवाल प्रलंबित आहेत. जिल्ह्यात एकूण २५७ नमुने घेण्यात आले त्यात १५ नमुने असुरक्षित होते तर ४ नमुने हे बनावट होते. इतर अन्न पदार्थ तपासणी करण्यासाठी ३५८ तपासण्या करण्यात आल्या.

मुख्यमंत्र्यांनी दिलेल्या १०० दिवसांच्या कार्यालय सुधारणा कार्यक्रमात छत्रपती संभाजीनगर येथील अन्न व औषध प्रशासन विभागाच्या कार्यालयाचा विभागस्तरावर प्रथम क्रमांक आला. तसेच जिल्ह्यात ईट राईट इंडिया चॅलेंज अंतर्गत छत्रपती संभाजीनगर परिमंडळ १ या कार्यालयाने प्रथम क्रमांक पटकावला आहे. या अंतर्गत जिल्ह्यात अंगणवाडी सेविका, अन्न पदार्थ विक्रेते यांना अन्न सुरक्षा विषयक प्रशिक्षण देण्यात आले.