Yavatmal Zilla Parishad Budget : यवतमाळ जिल्हा परिषदेच्या अर्थसंकल्पात कृषीवर ‘फोकस’

Yavatmal Zilla Parishad : यवतमाळ जिल्हा परिषद २०२२-२३ चे सुधारित आणि २०२३-२४ चे मूळ अंदाजपत्रक प्रशासक तथा मुख्य कार्यकारी अधिकारी डॉ. श्रीकृष्ण पांचाळ यांनी सादर केले.

आरंभीची शिल्लक दहा कोटी ८६ लाख ४३ लाख, १७ कोटी १६ लाख ६० हजार रुपये उत्पन्न, असे एकूण २८ कोटी तीन लाख तीन हजार रुपयांच्या अर्थसंकल्पावर मोहोर उमटली.

या अर्थसंकल्पात शेतकऱ्यांना केंद्रबिंदू ठेवून कृषीवर फोकस देण्यात आल्याचा दावा करण्यात आला.

मागील वर्षी सुरू केलेल्या शिक्षण विभागातील योजना महादीप, झेप यांना मिळालेला प्रतिसाद आणि यश बघता यंदाही या योजनांना भरीव तरतूद ठेवली आहे.

आरोग्य विभागात केंद्र व राज्य शासनाकडून येणाऱ्या योजना यशस्वीपणे राबविणाऱ्या कर्मचाऱ्यांना प्रोत्साहन देण्यासाठी तरतूद करण्यात आली आहे.

कृषी विभागात सोलवर आधारित योजना सुरू करून अल्पभूधारक शेतकऱ्यांना सर्व योजनांचा लाभ घेता येईल, असे नियोजन करण्यात आले.

तसेच कृषी विभागाला यावर्षी गेल्या वर्षीपेक्षा एक कोटी २८ लाख रुपयांची तरतूद अधिक देऊन कृषीला चालना देण्याचा प्रयत्न या अर्थसंकल्पातून करण्यात आला आहे. पशुसंवर्धन विभागाद्वारे पशुपालकांना उत्तम वैरण प्राप्त होण्यासाठी बियाणे संच देण्यासाठी तरतूद आहे.

समाजकल्याण विभागाद्वारे इतर रोजगार निर्मितीच्या तसेच थेट लाभार्थ्यांना लाभ देणाऱ्या योजनांसोबत यावर्षी व्यसनमुक्ती कार्यक्रमदेखील राबविण्यात येणार आहे. दिव्यांग कल्याणमध्ये रोजगार निर्मितीवर भर देवून ई-रिक्षा सांरख्या योजना राबविण्यात येणार आहे.

सामान्य प्रशासन विभागामार्फत जिल्हा परिषदेचे संपूर्ण विभाग ई-ऑफिससारखे कार्यक्रम राबवून प्रशासन गतिमान तसेच पारदर्शक करण्यात येणार आहे.

२०२२-२३मध्ये जिल्हा परिषदेला प्राप्त निधीचे शासन नियमाप्रमाणे वेळोवेळी स्पर्धात्मक दराने गुंतवणूक केल्याने जिल्हा परिषद सेसच्या व्याजाद्वारे मिळणाऱ्या उत्पन्नात वाढ झाल्याचा दावा सीईओ डॉ. पांचाळ यांनी केला.

यावेळी अतिरिक्त मुख्य कार्यकारी अधिकारी विनय ठमके, मुख्य लेखा तथा वित्त अधिकारी ज्योती भोंडे यांच्यासह सर्वच विभागांचे प्रमुख व कर्मचारी उपस्थित होते.