Fish Rate : मासळीचे दर आवाक्यात

Ratnagiri News : महिनाभरानंतर मासळीचे दर खवय्यांच्या आवाक्यात आले आहेत. त्यामुळे शहरातील विविध ठिकाणच्या मासळी मार्केटमध्ये ग्राहकांची गर्दी होत आहे. मिरकरवाडा बंदरावर बांगडा १०० रुपये किलो, तर सुरमई ४०० ते ६०० रुपये किलो दराने विकली जात आहे. गेल्या काही दिवसांत खोल समुद्रात मासळी समाधानकारक मिळत असल्यामुळे त्याचा फायदा ट्रॉलिंग, पर्ससीननेटद्वारे मासेमारी करणाऱ्यांना होत आहे.

दिवाळीपूर्वी कोकण किनारपट्टीवरील वातावरण बिघडल्यामुळे मासेमारी व्यवसाय अडचणीत होता. काहीवेळा मच्छीमारांना नौका बंदरावरच उभ्या करून ठेवाव्या लागत होत्या; परंतु मागील आठवड्यात चित्र बदलले आहे. खोल समुद्रात मासेमारीसाठी जाणाऱ्या मच्छीमारी नौकांना समाधानकारक मासळी मिळत आहे.

त्यामुळे दरही सर्वसामान्य ग्राहकाला परवडण्यासारखे आहेत. ९०० रुपये किलो दराने मिळणारी लहान आकाराची सुरमई रविवारी ४०० रुपये, तर मोठ्या आकाराची ६०० रुपये किलो दराने मिरकरवाडा जेटीवर उपलब्ध होती. महिनाभरापूर्वी बांगड्याचा किलोचा दर २०० रुपये होता तो १०० रुपयांवर आला आहे.

सर्वसाधारण १२० पर्यंत स्थिर राहील, असा अंदाज आहे. सरंगा ६०० रुपये किलो दराने मिळत होता. महिनाभरापूर्वी हाच दर अधिक होता. सौंदाळ्याचा दर मात्र महिनाभरापूर्वीप्रमाणेच ३०० रुपये किलो इतकाच आहे. कोळंबीचा दरही प्रतवारीप्रमाणे ८० ते ३०० रुपये किलो आहे.

गिलनेट नौकांना मासळीची प्रतीक्षा

खोल समुद्रात मासेमारीसाठी जाणाऱ्या मच्छीमारांना समाधानकारक मासे मिळत असले, तरीही गिलनेटद्वारे किनाऱ्यापासून ५ ते १० वावात मासेमारी करणाऱ्यांना मासे मिळत नाहीत. १०० पैकी ५ बोटींना मासे मिळत असल्याचे मच्छीमार अभय लाकडे यांनी सांगितले. ते म्हणाले, की मासेमारीचा खर्च २५ हजार रुपयापर्यंत येतो. मागील दीड महिन्यात समाधानकारक मासळी मिळत नाही, त्याचा फटका बसत आहे.