Solapur APMC Election : सोलापूर बाजार समितीच्या निवडणुकीसाठी रविवारी मतदान

Solapur News : सोलापूर कृषी उत्पन्न बाजार समितीच्या संचालक मंडळ निवडणुकीचा प्रचार आता अंतिम टप्प्यात असून, भाजपचे आमदार सचिन कल्याणशेट्टी विरुद्ध भाजपचेच आमदार सुभाष देशमुख यांच्या दोन्ही पॅनेलमध्ये भाजप विरुद्ध भाजप अशी चुरशीची लढत होत आहे.

दिग्गज नेत्यांसह अनेक नवखे उमेदवार निवडणुकीच्या रिंगणात आहेत. दोन्ही बाजूंनी आरोप-प्रत्यारोपांच्या फैरीने प्रचाराला चांगलाच जोर चढला आहे. दरम्यान, उद्या (ता.२७) या निवडणुकीसाठी मतदान होणार आहे. भाजपचे जिल्हाध्यक्ष, आमदार सचिन कल्याणशेट्टी यांनी काँग्रेसचे नेते, माजी आमदार दिलीप माने, सुरेश हसापुरे यांना सोबत घेत पॅनेल उभा केले आहे.

पण भाजपच्या धोरणाविरुद्ध ही युती झाली आहे, अशी नाराजी व्यक्त करत भाजपचे दुसरे आमदार सुभाष देशमुख यांनी भाजपचे म्हणून स्वतंत्र पॅनेल उभा केले आहे. त्याला पक्षाचे आमदार विजयकुमार देशमुख यांनी पाठिंबा दाखवताना, विरोधी गटातील नाराज राष्ट्रवादी काँग्रेसचे नेते, बळिराम साठे, बाळासाहेब शेळके, महादेव चाकोते यांनीही पाठिंबा दिला आहे. त्यामुळे निवडणुकीतील रंगत वाढली आहे.

आतापर्यंत काँग्रेसच्या नेतृत्वाखालील संचालक मंडळात केवळ १० मिनिटात बैठका उरकत होत्या आणि त्यांच्या लाभाचे विषय त्यात पाहिले जायचे, असा आरोप आमदार सुभाष देशमुख यांनी केला आहे.

रखडलेल्या प्रश्‍नांवर आरोप-प्रत्यारोप

विरोधी पॅनेलकडून मात्र या आरोपाला तोडीस तोड उत्तर देताना, जोरदार प्रत्युत्तर दिले जात आहे. त्याशिवाय बाजार समितीतील विविध रखडलेले प्रश्न, सुविधांवर आरोप-प्रत्यारोप होत आहेत. या सर्व पार्श्वभूमीवर मतदार कोणाच्या पारड्यात वजन टाकणार, याकडे आता सर्वांचे लक्ष लागले आहे.

रविवारी मतदान, सोमवारी निकाल

संचालक मंडळाच्या १८ जागांसाठी ही निवडणूक होत आहे. ग्रामपंचायत आणि सोसायटी मतदारसंघातील १५ जागा, व्यापारी मतदार संघातील २ आणि हमाल-तोलार मतदारसंघातून १ याप्रमाणे १८ जागा आहेत. निवडणुकीचा प्रचार अंतिम टप्प्यात आला असून, रविवारी (ता.२७) सकाळी आठ ते सायंकाळी सहापर्यंत सोलापूरसह ग्रामीण भागातील ८ केंद्रांवर मतदान होणार आहे. तर सोमवारी (ता.२८) लगेच दुसऱ्या दिवशी मतमोजणी होऊन निकाल जाहीर होणार आहे.