Ahilyanagar News : महावितरणने वीज कनेक्शन कायमस्वरूपी तोडलेल्या थकीत वीज बिल ग्राहकांसाठी अभय योजना जाहीर केली असून अभय योजना २०२४ नुसार थकबाकी एकरकमी भरल्यास थकबाकी वरील व्याज आणि विलंब आकारात सूट देण्यात येणार असून अहिल्यानगर जिल्ह्यात एकूण २ हजार ४३० वीज ग्राहकांनी ३ कोटी २८ लाख रुपयाचा भरणा करून थकबाकीतून कायमची मुक्ती मिळविली असून, नवीन वीज जोडणी मिळण्यासाठी पात्र झाले आहेत.
योजनेत सहभागी होण्यासाठी अर्ज केलेल्या उर्वरित वीज ग्राहकांचे काम प्रगतिपथावर आहे. या योजनेचा लाभ ३१ डिसेंबर २०२४ पर्यंत थकबाकी भरून घेता येणार आहे. सहभागाची मंगळवारी अंतिम मुदत आहे.
थकित वीजबिलामुळे कायमस्वरूपी वीज पुरवठा खंडित झालेल्या (पीडी) घरगुती, व्यावसायिक व औद्योगिक ग्राहकांसाठी ही १ सप्टेंबर २०२४ पासून ही योजना आहे. ३१ मार्च २०२४ पर्यंत थकित असलेल्या ग्राहकांसाठी ही योजना आहे. थकित बिलांच्या योजनेत कृषी ग्राहकांचा समावेश नाही.
या योजनेत वीज ग्राहकांना दिलासा देण्यासाठी थकीत बिलाच्या मूळ रकमेवरील व्याज आणि विलंब आकाराच्या स्वरूपातील दंड माफ करण्यात येणार आहे. वीजबिलाचा वाद न्याय प्रविष्ट असलेल्या पीडी ग्राहकांनाही या योजनेचा काही अटी व शर्तीवर लाभ घेता येईल. मूळ बिलाच्या ३० टक्के रक्कम भरून उर्वरित ७० टक्के रक्कम सहा हप्त्यांत भरायची सवलत ग्राहकांना मिळेल.
जे घरगुती, व्यावसायिक इत्यादी लघुदाब ग्राहक एक रकमी थकित बिल भरतील त्यांना दहा टक्के सवलत देण्यात येईल. उच्चदाब औद्योगिक व व्यावसायिक ग्राहकांना पाच टक्के सवलत मिळेल. अहिल्यानगर जिल्ह्यात या योजनेला मोठा प्रतिसाद मिळाला आहे. २ हजार ४३० वीज ग्राहकांनी ३ कोटी २८ लाख रुपयाचा भरणा करून थकबाकीतून कायमची मुक्ती मिळविली आहे.
वीज ग्राहकांना www.mahadiscom.in/wss/wss या वेबसाइटवरून ऑनलाइन तसेच महावितरणच्या मोबाइल ॲपवरून अभय योजनेचा लाभ घेता येईल. वीज ग्राहक १९१२, १८००२३३३४३५, १८००२१२३४३५ या टोल फ्री क्रमांकावर फोन करून आणि महावितरण कार्यालयात संपर्क करून ही माहिती घेऊ शकतात. योजनेनुसार पैसे भरल्यानंतर संबंधित वीज ग्राहकाला पुन्हा एकदा नियमित वीज जोडणी घेता येईल. त्याच पत्त्यावर योग्य पुरावे सादर करून नव्या नावाने वीज कनेक्शन घेण्याचीही सुविधा असेल, असे महावितरणकडून सांगण्यात आले.
थकबाकीमुक्त ग्राहक (कंसात वसुली)
अहिल्यानगर ग्रामीण ५५३ (३० लाख)
अहिल्यानगर शहर ४०७ (५२ लाख)
कर्जत ४४१ (३६ लाख)
संगमनेर ४१२ (५३ लाख)
श्रीरामपूर ६०९ (३९ लाख)
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.