Buldana News : खरीप हंगामात जूनच्या सुरुवातीला लागवड झालेले पीक आता दीड महिन्याचे होत आले आहे. यातील काही पिकांना युरियाची मात्रा देण्याची वेळ आलेली असून बाजारात हे खत सहजपणे मिळत नसल्याने शेतकरी तीव्र नाराजी व्यक्त करीत आहेत.
प्रामुख्याने बुलडाणा जिल्ह्यात मका पिकाला सध्या ही खतमात्रा देण्याची योग्य वेळ असल्याचे शेतकरी सांगत असून बाजारात खत मिळेनासे झालेले आहे. काही ठिकाणी वाढीव दरात तर काही जण लिंकिंग करून सर्रास विक्री करीत असल्याचा आरोपही शेतकरी करीत आहेत.
बुलडाणा जिल्ह्यात या वर्षी मका लागवडीने मुसंडी मारली आहे. खरिपातील मक्याचे क्षेत्र सुमारे ४० हजार हेक्टरपर्यंत पोहोचले आहे. आजवरची ही विक्रमी लागवड सांगितली जाते. मक्याचे पीक सध्या युरिया खताच्या कमतरतेमुळे पिवळे पडत असून, त्याचा उत्पादनावर गंभीर परिणाम होण्याची शक्यता निर्माण झाली आहे.
जिल्हयात युरियाचा साठा मुबलक असल्याचे कृषी खात्यातील अधिकारी सांगत आहेत. गेल्या दोन दिवसांत चार हजार टन युरियाच्या दोन रॅक लागल्या होत्या. एकीकडे कागदांवर युरियाचा साठा उपलब्ध असताना शेतकऱ्यांना हे खत सहजपणे मिळत नसल्याची वस्तुस्थितीही आहे. शेतकऱ्यांनी यावर्षी सोयाबीन, कपाशीचे क्षेत्र कमी करीत मक्याची पेरणी केली. हे पीक ऐन वाढीच्या टप्प्यावर असताना आता पिकाला युरियाची नितांत गरज निर्माण झालेली आहे. दुसरीकडे
बाजारात युरिया मिळेनासा झालेला आहे. या खतासाठी शेतकऱ्यांना कृषी केंद्रांच्या पायऱ्या झिजवाव्या लागत आहेत. शेतकऱ्यांची मागणी असूनही कृषी केंद्र चालकांना पुरेसे युरिया खत न देता त्यांना नॅनो युरिया व इतर अप्रासंगिक खते घेण्याचा आग्रह केल्या जात आहे. कंपन्यांनीच अशा स्वरूपाची लिंकिंग करून खते दिल्याने विक्रेतेही हतबल झालेले आहेत.
एकतर बॅगेसोबत दुसरे खत घ्या किंवा वाढीव दर द्या, अशा स्वरूपाचा व्यवहार सर्रास होत असल्याचे शेतकरी सांगत आहेत. कृषी खाते, कंपन्या व विक्रेत्यांच्या खेळात शेतकरी नाहक भरडल्या जात आहे. रॅक लागल्यानंतर मुख्य वितरकांना युरियाचा साठा मिळतो. मात्र, मागणी असूनही युरियाची ग्रामीण भागात पुरवठा केल्या जात नसल्याचे विक्रेते सांगत आहेत. नको असलेली खते जबरदस्तीने विक्रीसाठी घ्यावी लागत असल्याचेही एका विक्रेत्याने सांगितले.
खत उपलब्ध असल्याचा दावा
कृषी विभागाच्या दाव्यानुसार जिल्ह्यात खतांची कुठलीही टंचाई नाही. युरियाच्या तर गेल्या दोन दिवसांत दोन रॅक लागल्या. चार हजार टन पुरवठा झाला. शिवाय इतर खतेही मुबलक आहेत. शिवाय खतांची लिंकिंग केल्या जाऊ नये या बाबत विभागीय कृषी सहसंचालकांनी कंपन्यांच्या प्रतिनिधींची बैठक घेत स्पष्ट सुचनासुद्धा दिल्यात. कुठे खतांची लिंकिंग सुरू असेल किंवा वाढीव दरात विक्री होत असेल तर तत्काळ कृषी अधिकाऱ्याला या बाबत माहिती देण्याचे आवाहन या अधिकाऱ्याने बोलताना केले.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.