Fertilizer Shortage : युरिया, डीएपीचा तुटवडा, लिंकिंगने शेतकरी त्रस्त

Amaravati News : जिल्ह्यात युरिया व डीएपी खतांचा तुटवडा असून शेतकऱ्यांना लिंकिंगने तो विकत घेण्याची वेळ आली आहे. तथापि यासंदर्भात कृषी विभागाकडे एकही तक्रार प्राप्त झाली नसल्याचे कृषी अधिकाऱ्यांनी सांगितले. सद्यःस्थितीत दोन हजार ८४३ टन डीएपी व १० हजार ९९९ टन युरिया उपलब्ध आहे.

मागणीच्या तुलनेत तो कमी असला तरी वाढीव पुरवठा शासकीय पातळीवरूनच नसल्याने तुटवडा आहे. जिल्ह्यातील खरिपाची ९५ टक्के क्षेत्रातील पेरणी आटोपली आहे. कापूस, सोयाबीन व तूर ही मुख्य पिके असून मका, मूग, उडीद, ज्वारी या पिकांचीही पेरणी झाली आहे.

पिकांना वाढीसाठी या अवस्थेत डीएपी व युरियाची गरज शेतकऱ्यांकडून व्यक्त करण्यात येऊन मागणी वाढते. नेमक्या याच वेळी दोन्ही खतांचा बाजारात मोठा तुटवडा निर्माण झाला आहे.

ज्या विक्रेत्यांकडे ही खते उपलब्ध आहेत त्यांच्याकडून खतांबरोबर पूरक निविष्ठा खरेदी करण्याचा आग्रह शेतकऱ्यांना केला जात आहे. खतांच्या किमतीपेक्षा अधिक दर आकारत विक्री केली जात असली तरी अतिरिक्त निविष्ठांचाही भार शेतकऱ्यांवर आहे.

कृषी विभागाचे नियोजन

यंदाच्या खरीप हंगामासाठी रासायनिक खतांचा १ लाख ४३ हजार ६६९ टन साठा मंजूर करण्यात आला आहे. एप्रिल ते जुलै या कालावधीत ९३ हजार ९२३ टन खतांचा पुरवठा झाला आहे. जूनमध्ये ७० हजार ८०० टनांचे नियोजन करण्यात आले व ६४ हजार ११३ टन पुरवठा झाला. मार्चमध्ये ५ हजार ५५१ टन शिल्लक होते. सद्यःस्थितीत डीएपीचा २८४३ व युरियाचा १० हजार ९९९ टन साठा शिल्लक आहे.

एकही तक्रार नाही

बाजारात सुरू असलेल्या लिंकिंगची कृषी विभागाकडे अद्याप एकही तक्रार दाखल झालेली नाही. कृषी विभागाकडून वारंवार आवाहन केले जात असतानाही शेतकरी मात्र भीतीपोटी समोर येत नसल्याचे वास्तव आहे. कृषी निरीक्षकांचे अधिकार गोठवण्यात आल्यानंतर कृषिविकास अधिकाऱ्यांच्या नेतृत्वात भरारी पथक नियुक्त करण्यात आले आहे. मात्र या पथकांचा कारभार नेमका काय सुरू आहे, हे कळण्यापलीकडे असल्याचे शेतकऱ्यांचे म्हणणे आहे.