Orange Export Subsidy : संत्रा निर्यात अनुदानापासून शेतकरी राहणार वंचित

Amravati News : बांगलादेशाने आयात शुल्क वाढविल्याने राज्य सरकारने संत्रा उत्पादकांना निर्यातीवर पन्नास टक्के अनुदानाची घोषणा केली होती. त्यासाठी अमरावती जिल्ह्यातून ४९ कोटी ६३ लाख रुपये अनुदानाची मागणी सहकार विभागाकडून करण्यात आली आहे. अद्याप हे अनुदान प्राप्त झाले नसून, त्याचा प्रत्यक्ष लाभ निर्यातदार कंपन्यांनाच अधिक होणार आहे.

गेल्या हंगामात बांगलादेशने संत्र्याच्‍या आयात शुल्कात वाढ केल्यामुळे महाराष्ट्रातून होणारी संत्रानिर्यात प्रभावित झाली. ८८ रुपये प्रति किलो, असे आयात शुल्क बांगलादेशकडून आकारले गेले. त्यामुळे देशांतर्गत बाजारातील दरात मोठ्या प्रमाणात घसरण झाली. बांगलादेशने आयात शुल्‍कात भरमसाट वाढ केल्‍याने राज्‍य सरकारने संत्र्याच्‍या निर्यातीवर ५० टक्‍के अनुदानाची घोषणा केली होती.

त्यानुसार ४४ रुपये प्रती किलो अनुदान मिळणार आहे. जिल्हास्तरावर संबंधित जिल्हा उपनिबंधक प्रस्तावाची छाननी करतील. त्यानंतर पणन संचालक आलेल्या प्रस्तावांची पडताळणी करून प्रस्ताव अनुदान मंजुरीसाठी शासनाला सादर केला आहे. अमरावती जिल्ह्यातून ३१ निर्यातदार कंपनीकडून बांगलादेशात ११ हजार ३४७ टन संत्रा निर्यात झाला आहे.

राज्य सरकारने जाहीर केलेल्या पन्नास टक्के अनुदानापोटी ४९ कोटी ७६ लाख रुपयांचा प्रस्ताव शासनाला पाठविण्यात आला आहे. या अनुदानासाठी ५०२ शेतकरी पात्र ठरविण्यात आले आहेत. अद्याप हे अनुदान संत्रा उत्पादक शेतकरी किंवा निर्यातदार कंपनीला मिळालेले नाही.

शेतकऱ्यांना कसे मिळणार अनुदान?

संत्राउत्पादक शेतकऱ्यांकडून व्यापारी संत्रा विकत घेतात व तो नंतर पॅकिंग करून निर्यात करतात. प्रत्यक्ष शेतकरी निर्यात करीत नसल्याने त्यांना निर्यातीवरील अनुदान कसे दिले जाणार, हा प्रश्न कायम असून त्याबद्दल स्पष्टता नाही. सहकार विभागाकडून ५०२ शेतकरी संख्या दाखविण्यात आली असली तरी त्यांनी संत्रा निर्यातदारांना विकला आहे. निर्यात शुल्क निर्यातदारानेच भरले आहे.